बाजुरामा दाँते ओखर खेती (तस्वीर)

बाजुरा:बाजुरामा पछिल्लो समय दाँते ओखर खेती राम्रो हुँदै गएकाे छ।जिल्लाका ९ वटै स्थानीय तहका विभिन्न ठाउँमा लगाईएकाे दाँते ओखरका बिरुवा राम्रोसँग हुर्कनुका साथै फल्न समेत थालेका छन्।

व्यक्तिगत फर्म र विभिन्न समुहले लगाएका दाँते ओखरका बिरुवा पछिल्लो समय राम्रोसँग हुर्किन र फल्न थालेका हुन्।कतिपय स्थानमा परिक्षणकाे लागी वृक्षरोपण गरिएका विरुवा समेत राम्रो हुन थालेका छन्।

दाँते ओखर खेतीबाट जीविकोपार्जनमा सहज हुने सम्भावना देखिएपछि यहाँका अधिकांश किसानहरू यस खेतीतर्फ आकर्षित बन्दै गएका हुन्।बाजुराकाे हिमाली, जगनाथ, स्वामिकार्तिक,बुढीनन्दा,बडीमालिका,गाैमुल लगायतका स्थानीय तहमा पछिल्लो समय दाँते ओखर खेती राम्रो हुदैँ गएकाे छ।

एक लामो आयु हुने ठुलो रुखकाे रुपमा ओखरलाई लगिन्छ।जसको आयु करिब २०० वर्षसम्म हुने गर्छ। एक परिपक्व ओखरको रुखले वार्षिक १०० देखि २०० किलोग्रामसम्म फल दिन सक्ने कृषि ज्ञान केन्द्र बाजुराले जनाएको छ।

नेपालमा समुद्री सतहबाट ९०० देखि ३५०० मिटरसम्म ओखर खेती गर्न सकिने कृषि ज्ञान केन्द्र बाजुराका प्रमुख जसिराम साहानीलेे बताए।उनका अनुसार,हरेक विरुवा ७–७ मिटरको दूरीमा रोप्न उपयुक्त मानिन्छ ।भने प्रति रोपनी १० देखि १५ बिरुवा लगाउन सकिने जानकारी दिए।

ओखरले ५–६ वर्षपछि उत्पादन दिन सुरु गर्ने गरेकाे छ।
ओखर दीर्घकालीन आम्दानी दिने भएकाले किसानहरूको आकर्षण बढ्दै गएको पाईन्छ।बाजुरा जिल्लाका विभिन्न ठाउँमा अहिले व्यवसायकै रुपमा ओखर खेती गर्ने गरिएको छ।