दीपक खड्कालाई पक्राउ पुर्जी नदिई समातिएको सचिवालयको दाबी

काठमाडौं :  नेपाली कांग्रेसका नेता तथा पूर्व ऊर्जा, जलस्रोत तथा सिँचाइमन्त्री दीपक खड्कालाई सरकारले पक्राउ गरेको विषयमा उनको सचिवालयले आपत्ति जनाएको छ।

सचिवालयले आइतबार बिहान करिब ८ बजे केन्द्रीय अनुसन्धान ब्युरो ९सीआईबी० का प्रहरीले सोधपुछका लागि भन्दै उनलाई बिनापक्राउ पुर्जी नियन्त्रणमा लिएको आरोप लगाएको छ।

बिनाजानकारी र बिनापक्राउ पुर्जी नियन्त्रणमा लिनु कानुनविपरीत भएको सचिवालयको दाबी छ। खड्कालाई नियन्त्रणमा लिएपछि गृहमन्त्री सुधन गुरुङले सामाजिक सञ्जालमार्फत जरूरी पक्राउ पुर्जी सार्वजनिक गरेपछि मात्रै उक्त विषयमा जानकारी भएको उल्लेख गरिएको छ।

सचिवालयले खड्कामाथि राजनीतिक प्रतिशोधका आधारमा बदनाम गराउने, मिथ्या आरोप लगाउने तथा चरित्रहत्या गर्ने प्रयास भइरहेको आरोप लगाएको जनाएको छ।

‘दीपक खड्का खुला पुस्तकजस्तै व्यक्ति हुन् । राज्य पक्षले गर्ने कानुनी अनुसन्धानमा पूर्ण सहयोग गर्न तयार छन्,’ विज्ञप्तिमा भनिएको छ।

यसैबीच, भदौ २४ गते भेटिएको नगदसम्बन्धी विषयमा सम्पत्ति शुद्धीकरणसम्बन्धी कानुनी प्रावधानअनुसार सोधपुछका लागि नियन्त्रणमा लिइएको सरकारले स्पष्ट पारेको छ। उता खड्काको सचिवालयले कुनै आपराधिक कसुरमा पक्राउ नगरिएको जनाएको छ।

सचिवालयले अनुसन्धानलाई अतिरञ्जित गरी भ्रम फैलाउने तथा चरित्रहत्या गर्ने प्रयास नगर्न आग्रह गर्दै वास्तविकता बुझेर मात्रै समाचार सम्प्रेषण गर्न सञ्चारमाध्यमलाई अपिल गरेको छ।

खड्का अनुसन्धानका लागि सधैं तयार रहेको र राज्य पक्षबाट हुने विधिसम्मत प्रक्रियामा पूर्ण सहयोग गर्ने प्रतिबद्धता समेत सचिवालयले जनाएको छ।