चुनावमा एक्ला–एक्लै प्रतिस्पर्धा गर्न कांग्रेस उपसभापति विश्वप्रकाशको आग्रह

काठमाडौँ  : कांग्रेस उभापति विश्वप्रकाश शर्माले फागुन २१ मा दलहरुले एक्ला–एक्लै प्रतिस्पर्धा गर्नुपर्ने बताएका छन् । उनले सरकारलाई अझै निर्वाचनको वातावरण बनाउन पनि आग्रह गरेका छन् ।

‘फागुन २१ मा निर्वाचन सम्पन्न गराउने गरी सरकार दृढतापूर्वक अघि बढोस् । सरकारले वातावरण बनाउने काम अझै बनाओस्,’ निर्वाचन आयोगले विशेष महाधिवशेनलाई मान्यता दिए लगत्तै भने, ‘आगामी निर्वाचनमा एक्लाएक्लै चुनावमा लडौं । प्रधानमन्त्री कुर्सी ताकेर गर्ने गठबन्धन गर्ने कुरा खारेज भएका छन् । सरकार बनाउन चाहिने बहुमत पुगेन भने आवश्यक गणितको लागि संवाद गरौँला ।’

उनले मुलुकका स्थायी पद्दतिको लागि दलहरुबीच राष्ट्रिय सहमति गर्न पनि आग्रह गरे । ‘चुनावमा एकले अर्कालाई गाली गर्न बन्द गरौं,’ उनले भने, ‘मुलुकमा नयाँ आशा जगाउनु परेको छ । प्रत्येक नागरिकका लागि विश्वास जगाउने घडी हो । आशाको दियोमा प्रेमको तेल थप्दै विश्वास जगाऔं ।’

उनले पूर्व सभापति शेरबहादुर देउवा, कार्यवहाक सभापति पूर्णबहादुर खड्कालगायतका नेताहरुलाई नवीन कांग्रेसको अभियानमा लाग्न आग्रह गरे । ‘कोर्ट कचहरी नगरी महाअभियानमा सँगै जाऔँ भन्न चाहन्छौं,’ उनले भने ।