खप्तड छेडेदहमा ट्याक्टर दुर्घटना हुँदा एक जनाको मृत्यु

बाजुराः जिल्लाको खप्तड छेडेदह गाउँपालिकामा आइतबार राति ट्याक्टर दुर्घटना हुँदा एक जनाको मृत्यु भएको छ ।मृत्यु हुनेमा बुढीगंगा नगरपालिका–४ खोडालबाडाका अन्दाजी ३३ वर्षीय पदमबहादुर रावत रहेका छन् ।

खप्तड छेडेदह गाउँपालिकाबाट बुढीगंगा नगरपालिका आउदै गरेको भे २ त १५८८ नम्बरको ट्याक्टर ओरालो सडकमा अनियन्त्रित भई दुर्घटना हुँदा चालक रावतको घटनास्थलमै मृत्यु भएको हाे ।

वडा न‌‌‌म्बर ५ काे चिराल्ने कच्ची सडकमा ट्याक्टर दुर्घटना भएको हो । ट्याक्टरमा सवार रहेका चार जना मध्ये मृतक रावतका छोरा सञ्जय रावतलाई सामान्य चोट लागेको छ । घाइते बालकको स्थानीय स्वास्थ्य चौकीमा उपचार भइरहेको छ ।

अन्य तीन जना भने सकुशल रहेको प्रहरीको भनाई रहेको छ । ट्याक्टरको अगाडीको भाग करिव २५० मिटलर तल सडकमा खसेको र ट्राली ५० मिटर तल खसेको प्रहरीले जनाएको छ ।