सुडान दन्द्ध क्रसफायर’ मा चर्चित गायिकाको मृत्यु

खार्तुम- सुडानकी चर्चित गायिका साडेन गार्डुडको दुई समूहबीच भएको गोलाबारीमा ‘क्रसफायर’ मा परेर मृत्यु भएको छ । सुडानी सहर ओमर्डुनमा सेना र अर्धसैनिक बल आरएसएफ बीच भएको भिडन्तमा परेर उनको मृत्यु भएको उल्लेख गरेको छ ।

सर्वसाधारणमा पर्ने असर कम गर्न दुई समूहबीच सम्झौता भएको एक दिनपछि नै ३७ वर्षीय गायिकाले आफ्नो ज्यान गुमाउन परेको छ । गार्डुड अल–हसमाब क्षेत्रमा बस्दै आएकी थिइन् । पछिल्ला केही दिनमा त्यहाँ आरएसएफको उपस्थिति बढेको थियो ।

उनकी भान्जी हिरा हसान मोहम्मदले फेसबुकमार्फत निधनको पुष्टि गरेकी छन् । सामाजिक सञ्जालमा सेयर गरिएको भिडियोमा गार्डुड गोलबारीबाट बच्ने प्रयास गरिरहेको र आफ्नो छोरालाई झ्यालहरु बन्द गर्न आग्रह गरिरहेको देखिएको छ ।

गार्डुड नियमितरुपमा फेसबुक लाइभमा आएर त्यहाँ जारी दन्द्ध बारेमा जानकारी दिइरहन्थिन् । सुडानमा सेना र आरएसएफको शक्ति संघर्षका कारण गत अप्रिलदेखि दन्द्ध जारी रहेको छ ।