ज्येष्ठ नागरिक स्वास्थ्य सेवा शिविरबाट ३ सय ७० बढि लाभान्वित

बाजुरा: बाजुरा जिल्लाका ४ वटा स्थानीय तहका ४ वटा स्थानमा सञ्चालन गरिएको ज्येष्ठ नागरिक स्वास्थ्य सेवा शिविरमा करिब ३ सय ७० जना भन्दा बढि लाभान्वित भएका छन्।

जिल्ला अस्पताल बाजुरा, स्वास्थ्य कार्यालय बाजुरा र स्थानिय तहका स्वास्थ्य शाखाको पहलमा स्वास्थ्य कार्यालय बाजुराद्वारा आयोजित उक्त शिविरबाट ३ सय ७० बढि ज्येष्ठ नागरिकले सेवा लिएको स्वास्थ्य कार्यालय बाजुराले जनाएको छ।

शिविर त्रिवेणी,बुढीगंगा,खप्तड छेडेदह र गाैमुल गाउँपालिकामा सञ्चालन गरिएको हाे। चैत्र २६ देखि २९ गते सम्म सन्चालित शिविरमा मधुमेह, रक्तचाप,पल्सको जाँच गरिएकाे हाे।साथै लक्षणको आधारमा अन्य रोगको अवस्था पहिचान गरि औषधि बितरण र परामर्श सेवा प्रदान गरिएकाे हाे।

जटिल रोगका बिरामिको लागि थप जाँच र व्यवस्थापनको लागि प्रेषण पनि गरिएको स्वास्थ्य कार्यालय बाजुराका जनस्वास्थ्य अधिकृत कुमार न्याैपानेले जानकारी दिए।ज्येष्ठ नागरिकहरूको स्वास्थ्य अवस्थाबारे परीक्षण तथा आवश्यक उपचार सेवा प्रदान गर्ने उद्देश्यले आयोजना गरिएको शिविर प्रभावकारी समेत बनेकाे उनकाे भनाई छ।

ग्रामीण क्षेत्रमा रहेका ज्येष्ठ नागरिकहरूलाई सहज रूपमा स्वास्थ्य सेवा उपलब्ध गराउने लक्ष्यसहित याे शिविर सञ्चालन गरिएको हो।स्थानीयवासीहरूले निशुल्क स्वास्थ्य सेवा गाउँमा पाउँदा खुसी समेत भएका छन्।आगामी दिनमा बाँकी अन्य पालिकामा शिविर सञ्चालन गरिने स्वास्थ्य कार्यालय बाजुराले जनाएको छ।