नवनियुक्त अस्पताल अध्यक्ष भन्छन्,‘गुणस्तरीय स्वास्थ्य सेवा सुनिश्चितता पहिलाे प्राथामिकता’

बाजुरा: जिल्ला अस्पताल बाजुराका नवनियुक्त अस्पताल व्यवस्थापन समिति अध्यक्ष धन बहादुर रावतले ‘गुणस्तरीय स्वास्थ्य सेवा सुनिश्चितता पहिलाे प्राथामिकता’ रहेकाे बताएका छन्।शुक्रबार अस्पतालमा आयोजित स्वागत कार्यक्रममा बाेल्दै उनले गुणस्तरीय स्वास्थ्य सेवा आजकाे प्रमुख आवश्यकता रहेकाे बताएका हुन्।

बदलिँदाे परिस्थितिमा स्वास्थ्य सेवा जटिल बन्दै गएकाे अवस्थामा उनले स्वास्थ्य सेवाका क्षेत्रमा सबैले गम्भीर भएर लाग्नुपर्नेमा जाेड दिए।उनले अस्पतालकाे नीतिगत र प्रशासनिक क्षेत्रमा समेत सुधार ल्याउने बताएका हुन्। आफू अध्यक्षकाे पदमा रहेसम्म अस्पतालमा गुणस्तरीय सेवा प्रवाह,प्रशासनिक र नितिगत सुधारमा कुनै कमी हुन नदिने बताएका हुन्।

आफू फरक क्षेत्रकाे व्यक्ति भए पनि सबैकाे सुझाव,सल्लाह ग्रहण गर्दै अस्पतालका समस्या उठान र समाधानकाे निमित्त संघ तथा प्रदेश सरकारसंग हारगुहार गरेर भए पनि समाधान गरिने प्रतिबद्दता समेत व्यक्त गरे। जिल्लाकाे थप स्वास्थ्य क्षेत्र सुधारका लागी एक जनाले मात्रै केही नहुने हुँदा सम्पूर्ण स्वास्थ्यकर्मी लगायत सराेकारवाला निकायले हातेमालो गरेर अघि बढ्नुपर्नेमा जाेड दिए।

कार्यक्रममा बाेल्दै उनले भने,‘सर्वप्रथम अस्पतालमा दरवन्दी अनुसारका कर्मचारीकाे व्यवस्थापन गर्नु पहिलो प्राथामिकता रहने छ। ५० शैया अस्पतालमा रुपान्तरण गर्न आवश्यक दक्ष जनशक्ति,यन्त्र उपकरणकाे समेत व्यवस्थापन गर्न माग गरिने छ।अस्पतालबाट गुणस्तरीय सेवा प्रवाह गर्नु नै महत्त्वपूर्ण उपलब्धि हाे। ’

साथै उनले अस्पतालमा भईरहेका गतिविधि,समस्याहरु आफूलाई निर्धक्क तरिकाले सुनाउन समेत आग्रह गरे।उनले भने,‘तपाईँहरु सहज तरिकाले जनतालाई सेवा दिनुहाेस्। समस्या समाधान गर्ने जिम्मेवारी मेराे हाे।अस्पतालमा आर्थिक स्राेत,यन्त्र उपकरण व्यवस्थापन र प्रशासनिक तथा नितिगत सुधारमा कुनै कदम पछि हट्ने छैन्। ’

स्वागत् कार्यक्रममा बाेल्दै अस्पताल बाजुराका प्रमुख निमित्त मेडिकल सुपरिटेन्डेन्ट डाक्टर चन्द्रशेखर यादवले अस्पतालकाे सेवा विस्तारलाई थप गुणस्तरीय,प्रभावकारी र चुस्तदुरुस्त बनाउन अध्यक्षले ठुलाे भुमिका खेल्नेमा विश्वस्त रहेकाे बताए। अस्पतालमा थुप्रै समस्या रहेकाे बताउँदै उनले अध्यक्ष समक्ष ती समस्या समाधानकाे लागी आग्रह समेत गरे।

बिशेषगरी अस्पतालमा ब्लड बैंक सेवा सञ्चालन नहुँदा सेवाग्राहीहरुले भाेगिरहेका समस्याहरुलाई समाधान गर्न महत्त्वपूर्ण आवश्यक रहेकाे बताए। रगत अभावमा बर्षेनी विरामीहरुले छट्पटाउनु पर्ने बाध्यताकाे अन्त्य गर्न आवश्यक रहेकाे कुरामा जाेड दिए।उनले यसमा अध्यक्षकाे समेत महत्त्वपूर्ण भूमिका रहने बताउँदै गम्भीर ध्यानाकर्षण समेत गराए।

कर्मचारीहरुले एक बर्ष पछि अस्पतालले व्यवस्थापन समिति अध्यक्ष पाएकाेमा खुसी व्यक्त गर्दै जिम्मेवारी बाेधका साथै थप सहज हुने विश्वास व्यक्त गरे।अस्पतालकाे स्वास्थ्य सेवामा कुनै कमी नभई सहज,सुलभ र प्रभावकारी सेवा प्रवाह सुधारमा उनीहरुले जाेड दिएका थिए।

सुदूरपश्चिम प्रदेश सामाजिक विकास मन्त्रालयले जिल्ला अस्पताल बाजुरामा रावतलाई अस्पतालको व्यवस्थापन समिति अध्यक्षमा जिम्मेवारी दिएको थियाे। जिल्ला अस्पताल बाजुरामा नियुक्त भएका रावत नेपाली कांग्रेसका हुन्। यसअघि अस्पताल व्यवस्थापन समितिको अध्यक्षमा नेकपा समाजबादीका तर्फबाट सिफारीस भएका मान बहादुर कार्की थिए। उनको कार्यकाल सकिएसँगै अस्पताल अध्यक्ष विहिन थियो ।