बाजुरामा क्षयरोग नियन्त्रणमा चुनाैती: पाँच वर्षमा १८ जनाको मृत्यु

बाजुरा: बाजुरामा पछिल्लो पाँच वर्षमा क्षयरोगका कारण १८ जनाको मृत्यु भएको छ। विश्व क्षयरोग दिवस (मार्च २४) को अवसरमा स्वास्थ्य कार्यालय बाजुराले आयोजना गरेको कार्यक्रममा पछिल्लो पाँच वर्षमा क्षयरोगबाट १८ जनाको मृत्यु भएको तथ्य सार्वजनिक गरिएको हाे।

आर्थिक वर्ष ०७७/७८ मा १, ०७८/७९ मा ३, ०७९/८० मा २, ०८०/८१ मा ६, ०८१/८२ मा ४ र चालु आर्थिक वर्ष ०८२/८३ को फागुन मसान्तसम्म २ जनाको क्षयरोगबाट मृत्यु भएको स्वास्थ्य कार्यालय बाजुराले जनाएको छ।

गत आर्थिक वर्ष ०८१/८२ मा ३१० जनामा क्षयरोग पहिचान गर्ने लक्ष्य राखिएकोमा १४१ जनामा मात्रै संक्रमण पुष्टि भएको स्वास्थ्य कार्यालय बाजुराका जनस्वास्थ्य अधिकृत कुमार न्यौपानेले बताए ।

उनका अनुसार,जिल्लामा हाल ८१ जना संक्रमित बिरामीले नियमित औषधि सेवनमा गरिरहेकाे जानकारी दिए।बाजुराका ९ स्थानीय तहमध्ये सबैभन्दा उच्च दर बडीमालिका नगरपालिकामा रहेकाे पाईएकाे हाे।जहाँ (प्रतिलाख २१९) रहेको तथ्यांकले देखाएको छ।

जिल्ला अस्पताल बाजुराका प्रमुख डा. चन्द्रशेखर यादवले कमजाेर तथा रोगप्रतिरोध क्षमता कम भएका र धुमपान, मध्यपान वा लागुऔषध सेवन गर्नेमा यो रोगको सक्रमण बढि हुने बताए ।साथै क्षयरोगको औषधिको मात्रा पूर्ण सेवन नगरे सङ्क्रमण पुनः देखिन सक्ने बताएका हुन्।

उनले क्षयराेग न्युनिकरणकाे लागी प्रभावकारी कार्यक्रम सञ्चालन गर्न समेत आवश्यक रहेकाे जाेड दिए। क्षयरोग (टिबी) एक सरुवा रोग भएकोले जुन संक्रमित व्यक्तिले खोक्दा, हाछ्युँ गर्दा वा थुक्दा हावामार्फत अन्य व्यक्तिमा सर्ने गरेकाेले सबैले सचेतना अपनाउनु पर्ने बताएका हुन्।

हरेक बर्ष मार्च २४ का दिन मनाइने विश्व क्षयरोग दिवस बाजुरा जिल्लामा समेत अन्तरक्रियात्मक कार्यक्रम गरी मनाइएको हाे । सरकारले सन् २०३५ सम्म क्षयरोग नियन्त्रण र २०५० सम्म उन्मूलन गर्ने लक्ष्य लिएको छ।सन् २०३५ सम्म देशमा क्षयरोग अन्त्य गर्ने तथा सन् २०५० सम्म देशलाई क्षयरोगमुक्त बनाउने लक्ष्यका साथ विभिन्न कार्यक्रम गरी आज देशैभर दिवसलाई मनाईएकाे हाे।

नेपालको प्रमुख जनस्वास्थ्य समस्याका रूपमा रहेको क्षयरोगको पहिचान गरी निदान गर्ने र जनचेतना फैलाउने लक्ष्यका साथ याे दिवस मनाउन निकै महत्त्वपूर्ण मानिन्छ। क्षयरोग प्राचीन कालदेखि मानव समुदायमा विभिन्न रोग र सङ्क्रमणका रूपमा लिने गरिएको थियो। विश्व स्वास्थ्य सङ्गठनका अनुसार हरेक बर्ष संसारभर ८० लाख नयाँ क्षयरोगी थपिने गरेका छन् ।