बाजुरामा पुन:बाक्लाे हिमपात,जनजीवन कष्टकर

बाजुरा: बाजुरामा पुन: हिमपात भएको छ।गत शुक्रबार पहिलोपटक हिउँदे वर्षा संगै हिमपात भएको थियाे। पुन: मंगलबार रातीदेखि वर्षा र बाक्लाे हिमपात भएको हाे।

लगातारको मौसम बदलीपछि वर्षासंगै यहाँका उच्च हिमाली तथा लेकाली भेगहरुमा मंगलबार रातिबाटै वर्षा र हिमपात भएको हाे।पुन:वर्षासंगै हिमपात भएपछि यहाँका किसानहरु खुसी भएका छन् ।

बाजुराका ९ वटै स्थानीय तहका उच्च हिमाली तथा लेकाली भू-भागमा बर्षा र हिमपात जारी छ। बाक्लाे हिउँ परेसंगै यहाँकाे जनजीवन निकै कष्टकर बनेकाे छ।हिमपातसंगै चिसो बढेपछि वृद्धवृद्धा बालबालिका र दीर्घरोगीहरु बढी प्रभावित भएका छन् ।

बाक्लो हिमपात भएपछि यहाँका बडीमालिका, पोरखेलेक,कालाजग्रा,बुढीनन्दा,रानीसैन,सुनन्दा लगायतका अग्ला डाँडापाखा र हिमालहरु सेताम्ये बनेका छन् । वर्षासंगै हिमापात भएपछि सुक्न लागेको गहुँ बालीलाई थप राहत पुगेको कृषि ज्ञान केन्द्र बाजुराले जनाएको छ।

पुन: वर्षा संगै हिमपात हुँदा हिउँदे बालीनालीलाई थप राहत मिलेकाे कृषि ज्ञान केन्द्र बाजुराका कार्यालय प्रमुख जसीराम सहानीले बताए । वर्षासंगै हिमपात हुँदा किसानहरुलाई राहत पुग्नुका साथै सुक्न लागेको गहुँ बाली राम्रोसँग सप्रिने सहानीले बताए ।

गहुँ बालीसंगै चैतमा लगाउने धान बालीका लागि समेत सहज भएको उनकाे भनाई छ।बाजुराका उच्च हिमाली तथा लेकाली क्षेत्र अहिले हिउँकाे घुम्टाेमा सजिएकाे छ। अत्याधिक वर्षा र हिमपात भए पछि वन्यजन्तु समेत चिसाेले तलतिर झरेका छन्।

वर्षासंगै हिमपात भएपछि वन्यजन्तुको चोरी सिकारी बढ्ने भएको छ । हिमपातका कारण चिसोबाट बच्न वन्यजन्तुहरु बेसी झर्न थालेपछि स्थानीयहरुले त्यसको सिकारी गर्ने सम्भावना बढेको डिभिजन वन कार्यालय बाजुराले जनाएको छ। वन्यजन्तुकाे चाेरी,सिकारी नगर्न हुन समेत आग्रह गरिएको छ।

बाक्लाे हिमपातका कारण बाजुराकाे मार्तडी-काेल्टी सडकखण्ड अबरुद्ध भएको छ। बाजुराकाे पाेरखेलेकमा अत्याधिक हिउँ जमेकाेले यस सडकखण्डमा चल्ने सवारीसाधन ठप्प बनेका हुन्। हिजाे राती देखि सुरु भएको वर्षा र हिमपात अहिलेसम्म जारी छ। हिमपातका कारण विद्युत र टेलिफाेन सेवा समेत प्रभावित बनेकाे छ।