हातहतियार बुझाउन जिल्ला प्रशासन बाजुराकाे अनुराेध

बाजुरा: जिल्ला प्रशासन कार्यालय बाजुराले बाजुराबासी सम्पूर्णमा हातहतियार बुझाउन आग्रह गरेकाे छ। माघ १५ गतेभित्र जिल्लाभित्र रहेका सबै किसिमका हातहतियार तथा खरखजना बुझाउन निर्देशन दिएको हाे ।

कार्यालयले एक सूचना जारी गर्दै इजाजत प्राप्त वा इजाजत नलिई व्यक्तिगत रूपमा राखिएका भरुवा बन्दुक सहितका हातहतियार जिल्ला प्रहरी कार्यालय बाजुरा अथवा नजिकको प्रहरी इकाईमा बुझाउन सूचना मार्फत भनेकाे हाे।

आगामी प्रतिनिधिसभा सदस्य निर्वाचन २०८२ लाई स्वतन्त्र, निष्पक्ष, भरपर्दो र शान्तिपूर्ण रूपमा सम्पन्न गराउने उद्देश्यले निर्देशन जारी गरिएको जिल्ला प्रशासन कार्यालय बाजुराले जनाएको छ। तोकिएको म्यादभित्र हातहतियार तथा खरखजना नबुझाएमा प्रचलित कानुन अनुसार कारबाही गरिने प्रमुख जिल्ला अधिकारी डोरेन्द्र निरौलाले बताए ।

निर्वाचनका बेला हातहतियारका कारण उत्पन्न हुन सक्ने सम्भावित जोखिम, डरत्रास र अशान्ति न्यूनीकरण गर्दै जिल्लामा शान्ति-सुरक्षा कायम राख्न जिल्लाबासी सम्पुर्णलाई हातहतियार बुझाउन आग्रह गरिएको प्रजिअ निराैलाले जानकारी दिए।

आगामी फागुन २१ मा हुने निर्वाचनलाई मर्यादित,निष्पक्ष र भयरहित वातावरणमा सम्पन्न गर्न जिल्लाबासी सम्पुर्णले सक्रिय भुमिका निर्वाह गर्न अपिल समेत गरिएको छ।