बाजुरामा पहिलो पटक माइक्रोबायोलोजी ल्याब सेवा सञ्चालन

बाजुराः बाजुरा जिल्लामा इतिहासकै पहिलो पटक माइक्रोबायोलोजी ल्याब सेवा सञ्चालनमा आएको छ। जिल्ला अस्पताल मार्तडी बाजुरामा माइक्रोबायोलोजी ल्याब सेवा सञ्चालनमा आएको हो।

जिल्ला अस्पताल बाजुरामा पहिलो पटक माइक्रोबायोलोजी ल्याब सेवा सुचारु गरिएको अस्पताल बाजुराका प्रमुख डाक्टर चन्द्रशेखर यादवले बताए । उनका अनुसार,उक्त सेवा सञ्चालनमा आएसँगै जिल्ला वासीलाई ठूलो राहत मिल्ने जानकारी दिए।

बाजुरामा यो सेवा थप भए संगै ल्याबमा कल्चर सेवा सुचारु भएको छ।माइक्रोबायोलोजी ल्याब सेवाबाट विभिन्न संक्रामक रोगहरूको समयमै पहिचान गर्न सकिने र यसले उपचार प्रक्रियालाई थप प्रभावकारी बनाउने डाक्टर यादवले बताए ।

बाजुरामा यस अघि सामान्य परीक्षणका लागि समेत बिरामीलाई अन्य जिल्ला जानुपर्ने बाध्यता रहेको थियो। अब यो सेवा सञ्चालन भए पछि जिल्ला बाहिर धाउनुपर्ने बाध्यता हट्ने भएको छ। माइक्रोबायोलोजी ल्याब सेवा सुरु भएसँगै बिरामीले आफ्नै जिल्लामा सहज,सुलभ सेवा पाउने अस्पताल बाजुराका सूचना अधिकारी नृपराज गिरीले बताए ।

माइक्रोबायोलोजी ल्याब सेवा सञ्चालनले बाजुराका नागरिकलाई उपचारमा महत्त्वपूर्ण सहयोग पुग्ने सूचना अधिकारी गिरीले बताए । यहाँका नागरिकले बाजुरामै सहज र किफायती रूपमा स्वास्थ्य सेवा पाउने विश्वास लिइएको अधिकारी गिरीको भनाई छ।

जिल्ला अस्पताल बाजुराले पछिल्लो समय यहाँका नागरिकलाई सहज स्वास्थ्य सेवा उपलब्ध गराउँदै आएको छ। गुणस्तरीय तथा प्रभावकारी रुपमा अस्पताल बाजुराले नागरिकलाई स्वास्थ्य सेवा प्रदान गर्ने गरेको छ ।

अस्पताल बाजुरामा छिमेकी जिल्ला हुम्ला,मुगु,कालिकोट लगायत विभिन्न जिल्लाका नागरिक उपचारको लागी आउँने गरेका छन्।