संस्कृतिकाे संरक्षण र पुस्तान्तरण हुन जरुरी छ: वडा सदस्य राेकाया

बाजुरा: बडीमालिका नगरपालिका वडा.नम्वर ७ का वडा सदस्य तथा कार्यवाहक वडाअध्यक्ष लाेकेन्द्र बहादुर राेकायाले संस्कृतिकाे संरक्षण र पुस्तान्तरण हुन जरुरी रहेकाे बताएका छन्।

आइतबार बडीमालिका नगरपालिका ७ रजाताेलीमा भूवा पर्व मेला समापन कार्यक्रममा बाेल्दै सदस्य राेकायाले परम्परागत संस्कृतिकाे संरक्षण र भावी पुस्तामा पुस्तान्तरण अपरिहार्य रहेकाे बताएका हुन्।

भूवा पर्व बाजुराकाे एक माैलिक संस्कृति भएको बताउँदै उनले यहि माैलिक संस्कृतिबाट परम्परागत संस्कृतिकाे उजागर गर्न सकिने कुरामा उनले जाेड दिए। उनले भने,
“संस्कृति समाजकाे ढुकढुकी हाे,गहना हाे।समाजलाई पछिल्लो युगसम्म चिनाई राख्न यसले महत्त्वपूर्ण भूमिका निर्वाह गर्दछ।”

पौराणिक कालमा पाण्डव र कौरवको लडाइँमा लडाइँ मात्रै नभई विकासका काम पनि भएको हुँदा भुवा पर्व खेल्नेले त्यस बखतको विकासलाई समेत जोड्न दिनुपर्ने बताए । भूवा पर्वले विजयी उत्सवकाे रुपमा मात्र नभई आपसी सद्भाव,भेटघाट र मित्रताकाे प्रमुख सेतुकाे रुपमा काम गर्ने गरेकाे राेकायाले बताए ।

संस्कृति भनेको प्राकृतिक वस्तु नभई मानिसले चलनचल्तीमा चलाई आएकाे माैलिक धर्म भएकोले यसलाई सिक्ने र भावी पुस्तामा हस्तान्तरण गर्न अघि बढ्नुपर्ने बताएका हुन्।साथै उनले संस्कृति संरक्षणमा जाेड दिनुपर्ने बताउँदै संस्कृतिलाई समाजकाे महत्त्वपूर्ण अंगकाे रुपमा लिनुपर्ने बताए ।

पुर्खाैली परम्परालाई जाेगाउनु सबैकाे कर्तव्य भएकोले संस्कृतिलाई समाजका गहना ठानेर अघि बढ्नुपर्ने कुरामा राेकायाले जाेड दिए। उनले पछिल्लो समय परम्परागत संस्कृति विस्तारै लाेप हुने अवस्थामा पुगेकाे प्रति चिन्ता व्यक्त समेत गरे।

तिब्र प्रविधिकाे विकास संगै मानिस सस्ताे लाेकप्रियतामा हाेमिएका कारण समाजलाई चिनाउने परम्परा संकटमा पर्दै गएकाेले यसकाे संरक्षणमा चुनाैती थपिएको उनले प्रष्ट पारे।साथै उनले भावी पुस्ताहरुले संस्कृतिकाे संरक्षणमा जाेड दिनु पर्ने बताएका हुन्।