काेल्टीबाट राष्ट्रिय परिचयपत्र सेवा सुचारु: मार्तडी धाउनुपर्ने बाध्यताकाे अन्त्य

बाजुरा: बाजुराकाे बुढिनन्दा नगरपालिका काेल्टीबाट पुन: राष्ट्रिय परिचयपत्र सेवा सुचारु गरिएको छ। पहिले बर्षातकाे समयलाई मध्यनजर गर्दै १ महिनासम्मकाे लागी राष्ट्रिय परिचयपत्र विवरण संकलन कार्य सुरु गरिएकाे थियाे।

गत भाद्रमा तत्कालिन प्रमुख जिल्ला अधिकारी मेघनाथ पाध्या, सहायक प्रमुख जिल्ला अधिकारी शितल बहादुर रावल, हिमाली गाउँपालिकाका अध्यक्ष गोबिन्द मल्ल, स्वामीकार्तिक खापर गाउँपालिका अध्यक्ष भरत बहादुर रोकाया, लगायतको सहभागीतामा औपचारीक रुपमा सेवाकाे शुभारम्भ गरिएको थियाे ।

१ महिनासम्मकाे लागी सञ्चालित उक्त सेवा विचमा राेकिएकाे थियाे । अबबाट नियमित काेल्टीबाटै सेवा प्रवाह हुने गरि काम सुचारू गरिएको जिल्ला प्रशासन कार्यालय बाजुराले जनाएको छ।माथिल्लाे क्षेत्रका नागरिककाे सहजताका लागी राष्ट्रिय परिचयपत्र सेवा सञ्चालन गरिएको जिल्ला प्रशासन कार्यालय बाजुराका कम्प्युटर अपरेटर नैन रावलले बताए ।

काेल्टीमै सहज रुपमा सेवा पाउँदा नागरिकलाई सदरमुकाम मार्तडी धाउनुपर्ने बाध्यताकाे अन्त्य भएको हाे। पूर्वी-उत्तरी भेगका चार स्थानीय तहका बासिन्दालाई लक्षित गर्दै सेवा विस्तार गरिएको नगर प्रमुख जनक कुमार बाेहराले बताए । नागरिकलाई नजिकबाटै सजिलो, सरल र छिटो सेवा उपलब्ध गराउन सेवा सुचारू गरिएको बाेहराकाे भनाइ छ।

राष्ट्रिय परिचयपत्र तथा पञ्जिकरण विभागबाट जिल्लाका लागि थप भएको स्टेशन कोल्टीमा राखेर सेवा प्रवाह सुरु गरिएको हाे । प्रशासन कार्यालय बाजुराले यहाँका ४ वटा स्थानीय तहका नागरिकहरुको सहजताका लागि सेवा सुचारु गरेकाे हाे।याे भन्दा अघि मार्तडीमा मात्रै परिचयपत्र विवरण संकलनको स्टेशन रहेको थियाे ।

मार्तडीमा मात्रै स्टेसन हुँदा माथिल्लो क्षेत्रका नागरिकले हप्तादिन लगाएर परिचयपत्र बनाउनुपर्ने बाध्यता थियाे।
अब नियमित काेल्टीबाट परिचयपत्रकाे काम हुने हुँदा यहाँका नागरिकहरुलाई सहजता निकै राहत मिल्ने भएको हाे।काेल्टीबाटै नियमित सेवा प्रवाह सुचारू हुँदा त्यहाँका स्थानीय खुसी समेत भएका छन्।

माथिल्लाे क्षेत्रका नागरिककाे लागी कोल्टी उपयुक्त ठाउँ भएकाले यहाँका नागरिकलाई यस सेवाले ठुलाे राहत पुग्ने अपेक्षा लगिएको छ। कोल्टीमा सेवा थालिएसँगै दैनिक २० जना नागरिक परिचयपत्र बनाउन आउने गरेको कर्मचारी सन्तोषी विकले बताइन् ।

सेवा लिन आउने अधिकांश नागरिक सेवा प्रवाहबाट खुसि समेत भएको बताउँदै उनले अब नियमित रुपमा माथिल्लो क्षेत्रका नागरिकले सहज रुपमा काेल्टीमै राष्ट्रिय परिचयपत्रकाे सेवा पाउँने जानकारी दिईन्।अब जिल्ला प्रशासन कार्यालय मार्तडी र कोल्टी दुवै स्थानबाट परिचयपत्र सेवा उपलब्ध हुने भएको हाे ।

सरकारले अहिले नागरिकता प्रमाणपत्रको विकल्पका रूपमा राष्ट्रिय परिचयपत्रलाई अनिवार्य गरेकाे हुँदा बाजुरा मात्र नभई देशभरकै प्रशासन कार्यालयमा परिचयपत्र बनाउने सेवाग्राहीकाे भिड लाग्ने गरेकाे छ ।