अस्पताल बाजुरामा ओ.पी.डी. सेवा बन्द

बाजुरा : जिल्ला अस्पताल बाजुरामा ओ.पी.डी. सेवा बन्द गरिएको छ । नेपाल चिकित्सक संघको निर्णय बमोजिम सोमवार ओ.पी.डी.सेवा भन्द गरिएको अस्पताल बाजुराले जनाएको छ । अस्पतालले एक सुचना जारी गर्दे ओ.पी.डी. सेवा बन्द भएको जनाएको हो ।

उपभोक्ता अदालतको निर्णय विरुद्ध चिकित्सक संघले देशभर आन्दोलन गरी रहेको भन्दै जिल्ला अस्पतालमा सो सेवा बन्द भएको अस्पताल कार्यालय प्रमुख डाक्टर चन्द्र शेखर यादवले बताए ।

उनले भने,“नेपाल चिकित्सक संघले आज देशभर आकस्मिक बाहेकका सेवा बन्द गरे संगै अस्पताल बाजुरामा पनि सो सेवा बन्द गरिएको हो ।” उपभोक्ता अदालतले चिकित्सकीय अभ्यास सम्बन्धी पछिल्ला मुद्दामा सुनाएको फैसलाले नेपाल मेडिकल काउन्सिलको क्षेत्राधिकार माथि हस्तक्षेप भएको भन्दै नेपाल चिकित्सक संघले आज देशभर आकस्मिक बाहेकका सेवा बन्द गरेको हो ।

देशभरका चिकित्सक तथा स्वास्थ्यकर्मीहरूलाई असार १७ गतेदेखि कालोपट्टी बाँधेर सेवा दिन आह्वान गरेको संघले आज आकस्मिक बाहेकका सेवा रोकेको जनाएको छ ।

केही साता यता उपभोक्ता अदालतले उपचारमा लापरवाही गरेको मुद्दामा बिरामीका आफन्तको पक्षमा फैसला गरेको थियो । उपभोक्ता अदालतले ओम अस्पतालले ५० लाख ७० हजार, हिमाल अस्पताल र उपचारमा सम्लग्न चिकित्सकले १ करोड ४५ लाख रुपैयाँ र ग्राण्डी सिटी अस्पताल र त्यहाँ उपचारमा कार्यरत चिकित्सकले ५७ लाख रुपैयाँ क्षतिपूर्ति बिरामी पक्षका परिवारलाई तिर्नुपर्ने फैसला गरेको थियो ।