बाजुराका १५ वर्षीय बालक तीन महिना देखि बेपत्ता, खोजीका लागि परिवारको हारगुहार

मिन बहादुर खड्का,काठमाडौं-  बाजुराको खप्तड छेडेदह गाउँपालिका २ पिपलगाउँका १५ वर्षीय बालक पञ्कज थापा ३ महिना देखी भएका छन् । गत माघ १६ गते घरबाट हिँडेका थापा अहिले सम्म परिवारको सम्पर्कमा नआएको पारिवारिक श्रोतले जनाएको छ । माघ १६ गते फुपूको घर जान्छु भनेर हिँडेका उनी माघ २० गते सम्म फुपूको घरमा बसेका थिए ।

२० गते घर जान्छु भनेर फुपूको घरबाट फर्किएका उनी घर नफर्किएर छिमेकी जिल्ला अछाममा आयोजित साँफेबगर महोत्सव हेर्न गएको बेपत्ता थापाकी आमा बिन्दु थापाले जानकारी दिएकी छन् ।उनका अनुसार त्यतीबेला अछामको साँफेबगरमा महोत्सव लागेको थियो । उनी घर जान्छु भनेर फुपूको घरबाट हिँडेका थिए तर घर नफर्किएर उनी त्यहीँबाट अछाम तिर लागेका थिए। फुपूको घर गएको छन् भनेर ढुक्क बसेको परिवारलाई उनी फुपूको घरबाट हिँडेको चार दिन पछि मात्रै थाहा भयो।

त्यसपछि खबर गर्दा अछामको कालिमाटीमा रहेको खबर प्राप्त भएपनि खोजी गर्दा काहिँकतै नभेटिएको बताईएको छ। अछाममा पनि आफ्न्त चिनेजानेका सबै ठाउँ खबर गरिसकेको तर कतै नभेटिएको उनकी आमा बिन्दु थापाले बताइन् ।तीन महिना देखि निरन्तर खोजी रहेका छौँ, सबै ठाउँ खबर गरिसक्यौँ, गर्नुपर्ने जति सबै प्रयास गर्यौँ, फुपूको घर गएको छ फर्केला भन्ने लाग्यो, तर त्यहाँबाट साँफे गएको भन्ने चार दिन पछि मात्रै थाहा भयोूबेपत्ता थापाकि आमा बिन्दुले दुखेसो पोखिन् ।

अहिले उनको परिवार उनको खोजीका लागि हारगुहार गरिरहेको छ । उनको खोजीका लागि स्थानीय वडा कार्यालय, प्रहरी लगायत सवै ठाउँमा निवेदन दिएर खोजीका लागि अनुरोध गरिसकेको थापाले बताएकी छन् । थापा अहिले बेपत्ता छोराको खोजीका लागि धनगढी सम्म पुगेकी छन् ।अत्तरिया, महेन्द्रनगर, धनगढी लगायतका सबै क्षेत्रमा खोजिरहेको उनको भनाई छ । छोराको खोजिका लागि आफ्ना तर्फबाट गर्नुपर्ने सवै प्रयासहरु गरेको बताएकि थापाका सबै अथक प्रयासहरु असफल भएका छन् ।

उनले कैलाली,कञ्चनपुर,अछाम, बाजुराका सवै जिल्ला प्रहरी कार्यालयमा निवेदन समेत दिएकी छन् । प्रहरीले पनि खोजिरहेको छ । उनले आफ्नो छोरालाई कोही कसैले काहिँ कतै भेटाएमा आफ्नो सम्पर्क नम्बर ९८४८२२२४४० मा सम्पर्क गरिदिन आग्रह गरेकी छन् ।