स्वास्थ्यकर्मी नेपालीले रगत दिएर बचाए सुत्केरी सुलोचनाको ज्यान

बाजुराः  जिल्लाको बडीमालिका नगरपालिका वडा नम्बर ९ मार्तडी घर भएका स्वास्थ्यकर्मी प्रेम नेपालीले रगत दिएर एक सुत्केरीलाई नयाँ जिवन दिनुभएको छ । स्वामीकार्तिक खापर गाउँपालिका वडा नम्बर ४ की २८ बर्षीय सुलोचना नेपालीलाई स्वास्थ्यकर्मी नेपालीले रगत दिएर सुत्केरी सुलोचनाको ज्यान बचाएका हुन् ।

करिब दुई हप्ता अगाडि कोल्टी आधारभूत अस्पतालमा पुगेकी नेपालीले मृत बच्चाको जन्म दिएकी थिइन् । त्यसपछि केही दिन अस्पतालमै रहेकी सुत्केरी नेपालीको विस्तारै स्वास्थ्यमा सुधार हुदैँ गएपछि घर फर्किएकी थिईन् तर माघ २४ गते एक्कासी स्वास्थ्यमा समस्या भएपछि फेरी अस्पताल पुग्दा अत्याधिक रक्तस्राव भएर शरीरमा हेमोग्लोविनको मात्रा जम्मा ५ दशमलव २ मात्र भएको हुँदा उनलाई रगत दिनुपर्ने देखियो तत्पश्चात कोल्टी अस्पतालमै कार्यरत सहायक फार्मासिस्ट प्रेम नेपालीले रगत दिएर उनको ज्यान बचाएका हुन् ।

बाजुरामा ब्लड बैङक नहुँदा यहाँका गर्भवती तथा सुत्केरी महिलालाई समस्या हुँदै आईरहेको छ । बाजुरामा स्वास्थ्यकर्मी,स्थानीय,सुरक्षामर्की र पत्रकारहरुले रगत दिनुपर्ने अबस्था रहेको छ ।यता गत सोमबार जिल्ला प्रशासन कार्यालय बाजुरामा बसेको सरोकारवाला निकायको बैठकले बाजुरामा तत्काल ब्लड बैङक स्थापना गरिने जनाएको छ ।

ब्लड बैङक स्थापना गर्नको लागी सुदुरपचिम प्रदेश सरकार सामाजिक विकास मन्त्रालय र नेपाल रेडक्रस सोसाईटी बाजुराबिच २०८१ पुस २१ गते सम्झौता भएको जनाइएको छ । गत सोमबार बसेको सरोकारवालाको बैठकले तत्काल ब्लड बैङक स्थापना गर्ने निर्णय गरेको प्रमुख जिल्ला अधिकारी मेघनाथ पाध्यायले बताएका छन् ।ब्लड बैङक स्थापनाको लागी आवश्यक पर्ने रेफ्रिजेनेरेटर फ्रिज मर्मत गरी चालु गर्नको लागी स्वास्थ्य कार्यालय बाजुरालाई अनुरोध गरिएको उनले बताएका छन् ।