प्रधानमन्त्रीको राजीनामा माग गर्ने एमालेको अडान कायम, राष्ट्रिय सभा बैठकमा अवरोध

काठमाडौँ- प्रमुख प्रतिपक्ष दल नेकपा एमालेले प्रधानमन्त्री पुष्पकमल दाहाल ‘प्रचण्ड’ को राजीनामा माग गर्दै राष्ट्रिय सभा बैठक अवरोध गरेको छ । प्रधानमन्त्री दाहालले केही दिनअघि दिएको अभिव्यक्तिलाई लिएर प्रमुख प्रतिपक्ष दल नेकपा एमालेले राष्ट्रिय सभा बैठक अवरोध गरेको हो ।

प्रधानमन्त्री दाहालले आफूलाई प्रधानमन्त्री बनाउन सरदार प्रितम सिंह पटक–पटक भारत गएको भन्ने अभिव्यक्तिले नेपालको राष्ट्रिय स्वाभिमान र राष्ट्रिय स्वाधीनतामा आँच पुगेको एमाले सांसद भैरव सुन्दर श्रेष्ठले बताए । उनले प्रधानमन्त्रीले राजीनामा नदिए सम्म संसद् चल्न नदिने भन्दै बैठक अवरोध गर्ने जानकारी राष्ट्रिय सभा अध्यक्षलाई दिए ।

उनले भने, ‘यो खालको आचरण गर्ने व्यक्ति प्रधानमन्त्रीको कुर्सीमा बस्न सुहाउँदैन । नैतिकताको आधारमा उहाँले राजीनामा दिएर मार्ग प्रशस्त गर्नुपर्छ भन्ने नेकपा एमालेको संसदीय दलको धारणा हिजो हामीले सार्वजनिक गरिसकेका छौँ । आज पनि कुनै रहरले सदन बन्द गर्न गइरहेका छैनौँ । हामी बाध्य छौँ । देशको सार्वभौमिकता, देशको स्वाधीनता र स्वाधीन राष्ट्रलाई आँच आउने गरी यस्तो कुनै व्यक्तिबाट कुरा आउँछ भने त्यो नेकपा एमालेको निम्ति सह्य हुँदैन । आम नागरिकको लागि सह्य हुँदैन ।

हाम्रो देशको प्रधानमन्त्री कुन देशबाट निर्देशित हुनुहुन्छ कसबाट परिचालित हुनुहुन्छ को बाट निर्देशित भएर चल्नुभएको छ यो दुःखको कुरा हो । यो सदनको कामलाई अगाडी नबढाइयोस् ।’ राष्ट्रिय सभा बैठक असार २२ गते शुक्रवार अपराह्न १२ः२९ मा बस्ने गरी बोलाइएको छ ।