धनगढीका निजी अस्पताल मापदण्ड विपरीत, ­­कारबाही गर्ने चेतावनी

धनगढीः कैलालीको धनगढीमा सञ्चालित निजी अस्पतालहरु मापदण्ड विपरीत सञ्चालन भइरहेको पाइएको छ। स्वास्थ्य संस्था सञ्चालन मापदण्ड २०७७ को दफा ७० (घ) अनुसार धनगढीका निजी अस्पताल सञ्चालन नभएको पाइएको हो। सो मापदण्डअनुसार अस्पतालमा उपचारका लागि आउने विपन्न, असाहय, तथा बेवारिसे बिरामीका लागि कुल अस्पतालमा भएको बेड संख्याको १० प्रतिशत निःशुल्क अनिवार्य उपचार उपलब्ध गराउनुपर्ने भए पनि धनगढीमा त्यसको कार्यान्वयन नभएको देखिएको छ।
धनगढी उपमहानगरपालिकाले गरेको विभिन्न निजी अस्पतालहरुको अनुगमनका क्रममा स्वास्थ्य संस्था सञ्चालन मापदण्ड २०७७ तथा अन्य प्रचलित कानुनमा भएका सम्पूर्ण व्यवस्थाहरु पालना गर्नु भएको छैन्। उपमहानगरपालिकाले सूचना नै जारी गरेर मापदण्डअनुसार अस्पताल सञ्चालन गर्न भनेको छ।

जारी सूचनाअनुसार तोकिएको मापदण्डअनुसार अस्पताल सञ्चालन नभए कानुन बमोजिम कारबाही गरिने उल्लेख छ। धनगढी उपमहानगरपालिकका निमिक्त प्रमुख प्रशासकीय अधिकृत नरेन्द्रबहादुर खातीले आज सूचना जारी गर्दै धनगढीका सम्पूर्ण अस्पतालहरुले अनिवार्य रुपमा मापदण्डको पालना गरेर विपन्न, असाहय र बेवारिसे बिरामीको उपचारमा १० प्रतिशत निःशुल्क अनिवार्य उपचार उपलब्ध गराउन आग्रह गरिएको छ।