हिमालयन अन्तर्राष्ट्रिय अवार्ड उत्कृष्ट ५ सार्वजनिक

काठमाडौँ – तेस्रो हिमालयन अन्तर्राष्ट्रिय अवार्ड २०७९ को उत्कृष्ट पाँच मनोनयन सूची सार्वजनिक भएको छ । आयोजक वुमेन्स एरा एण्ड मिडिया ग्रुपले एक विज्ञप्ति जारी गर्दै मनोनयन सूची सार्वजनिक गरेको हो । अवार्डका लागि आवदेन दिएका गीत संगीतबाट उत्कृष्ट पाँच सूची तयार गरिएको हो । ‘भाषा, साहित्य कला र संस्कृतिका सर्जकको सम्मान, हाम्रो एक अभियान’ भन्ने मूल नाराका साथ आयोजना हुन लागेको अवार्डमा ३२ विधा समेटिएको छ ।

आगामी वैशाख ९ गते शनिवार भव्य समारोहबीच आयोजना हुने अवार्ड समारोहमा उत्कृष्ट पाँच मध्ये सर्वोत्कृष्टलाई अवार्ड प्रदान गरिने अवार्ड संयोजक गीता अधिकारीले बताइन् । अवार्ड समारोहमा नेपाली गीत संगीतको क्षेत्रमा योगदान पुर्याउने एकजना विशिष्ट व्यक्तिलाई ‘लाईफ टाइम अचिभमेन्ट अवार्ड’ प्रदान गरिनुका साथै गीत संगीतको क्षेत्रमा विशिष्ठ योगदान पुर्याउने संगीतकर्मीलाई विशेष सम्मान गरिनेछ । अवार्डमा कला क्षेत्रमा कलम चलाउने पत्रकारलाई समेत सम्मान गरिने अवार्डका अध्यक्ष गणेश सुवेदीले जानकारी दिए ।