लुम्बिनीको प्रदेश सभाको बैठक २ दलले सरकारलाई दिएको समर्थन फिर्ता लिंदै

दाङ – लुम्बिनी  प्रदेशसभाको बैठक बुधबार बस्दैछ । करिब महिना दिनपछि प्रदेश सभाको छैठौं बैठक बुधबार दिउँसो १ बजे बस्ने भएको छ ।बुधबार बस्ने प्रदेश सभाको बैठक मार्फत साना दलहरुले सरकारलाई दिएको समर्थन फिर्ता लिने तयारी गरेका छन् ।
एमालेका मुख्यमन्त्री गिरीलाई विश्वासको मत दिएर सरकारलाई समर्थन लोसपा र नागरिक उन्मुक्ति पार्टीले समर्थन फिर्ता लिने तयारी गरेका हुन् ।नागरिक उन्मुक्तिका संसदीय दलका नेता धर्मबहादुर चौधरीले सम्भवतः आजै सरकारको समर्थन फिर्ता लिने तयारी गरेको बताए ।
यद्यपि लोसपा र नागरिक उन्मुक्ति भने सरकारमा सहभागी छैनन् । लुम्बिनी प्रदेश सभामा नागरिक उन्मुक्तिको चार र लोसपाको तीन जना सांसद छन् ।यता, आठ दलको बैठक आज बिहान ११ बजे दाङको देउखुरीमा बस्न लागेको छ । केन्द्रमा सत्ता समीकरण बदलिएसँगै लुम्बिनीमा पनि एमाले नेतृत्व सरकारलाई अल्पमतमा पारेर नयाँ सरकार गठनको प्रयास स्वरुप आठ दलहरुबीच बैठक बस्न लागेको हो ।
लुम्बिनी प्रदेश सभामा एमालेका २९, कांग्रेसका २७, माओवादी केन्द्रका १०, राप्रपा र नागरिक उन्मुक्तिका चार/ चार, जसपा, लोसपा र जनमतका तीन /तीन, नेकपा एकीकृत समाजवादी र जनमोर्चाका एक एक र स्वतन्त्रका २ प्रदेश सभा सदस्यहरु रहेका छन् ।