लुम्बिनी प्रादेशिक अस्पतालको टेण्डर प्रकरण : कारबाहीमा पर्ने भएपछि सीईओको राजीनामा

  चैत्र,१५- पदको दुरुपयोग गरेको निष्कर्षसहित लुम्बिनी प्रदेश सरकारले कारबाहीको तयारी गरिरहेको बेलामा लुम्बिनी प्रदेश पूर्वाधार विकास प्राधिकरणका प्रमुख कार्यकारी अधिकृत अनन्तराम घिमिरेले राजीनामा दिएका छन् ।

लुम्बिनी प्रदेश सरकारकै गौरवको आयोजना मानिएको बुटवलस्थित लुम्बिनी प्रादेशिक अस्पतालको नयाँ भवन निर्माणका लागि आह्वान गरिएको टेण्डर विवादित भएपछि रद्द गरिएको थियो । लगत्तै प्रदेश प्राधिकरण आयोजनाका कार्यकारी निर्देशक घिमिरेले राजीनामा दिएका हुन् । उनले चैत १३ गते दिउँसो प्रेस नोट लेखेर राजीनामाको जानकारी दिएका हुन् ।

सरकारका प्रवक्ता एवं आन्तरिक मामिला सञ्चार मन्त्री तिलकराम शर्माले लुम्बिनी प्रादेशिक अस्पतालको ठेक्का निकाल्ने, टेण्डरको प्राविधिक रूपले जाँचबुझ गर्ने जिम्मेवारी सीईओकै भएको बताउँदै त्यसमा प्राविधिक रूपमा त्रुटि पाइएपछि रद्द गर्ने र अगाडि बढ्न आदेश दिइएको स्मरण गराए । घिमिरेले टेन्डर प्रक्रियामै त्रुटि गरेकाले उनीमाथि सरकारले कारबाहीको तयारी गरेका बेला आफू चोखो बन्नका लागि राजीनामा दिएको मन्त्री शर्माको भनाइ छ ।

घिमिरेले आफ्नो पदीय हैसियत भुलेर आर्थिक रूपमा बार्गेनिङ गर्ने, सरकारको नाम जोडेर कमिसन नपाएसम्म काम अगाडि नबढाउने लगायतको काम गरेको मन्त्री शर्माले बताए । उता प्रेस विज्ञप्ति जारी गरेर राजीनामाको घोषणा गरेका घिमिरे भने सम्पर्कमा आएका छैनन् । रातोपाटीले उनको प्रतिक्रिया लिन पटक पटक फोन गरे पनि मोबाइल ‘अफ’ भएकाले सम्पर्क हुन सकेन ।

भवन निर्माणका लागि आह्वान गरिएको ठेक्का कुनै दुई कम्पनीमात्र छनोट गर्ने गरी स्पेसिफिकेसन तयार गरेर प्रक्रियामै सेटिङ गरेको रहस्य बाहिर आएसँगै प्रदेश पूर्वाधार विकास प्राधिकरणले टेण्डर रद्द गरेको जनाएको छ । करिब ७ अर्ब रुपैयाँ लागतमा बन्ने बुटवलस्थित लुम्बिनी प्रादेशिक अस्पतालको नयाँ भवन निर्माणका लागि गरिएको टेन्डर सोमबार नै रद्द गरिएको प्राधिकरणले जनाएको छ ।

यो समाचार आजको रातोपाटिमा छ ।