‘नेपाल आइडल भएपछि प्रेसर महसुस गरेको छु’

चैत्र,७-   शनिबार ‘नेपाल आइडल सिजन–४’ को विजेता बनेपछि गायक भूपेन्द्र थापामगर यतिबेला चर्चाको केन्द्रमा छन् । प्रतियोगिताको टप ३ मा रहेका प्रतिस्पर्धी नाम्गेल तामाङ र रञ्जित नेपालीलाई पछि पर्दै उनले उपाधिको साथमा नगद ३० लाख समेत हात परेका छन् । नेपाल आइडलको पहिलो सिजनदेखि नियमित र पटक पटक उपाधिका लागि कोसिस गर्दै आएका उनले चौथो सिजनमा आएर सफलता हात पार्न सफल भएका हुन् । प्रस्तुत छ, नेपाल आइडल विजेता बन्दाको खुसी र आगामी दिनको योजनाको विषयमा उनले रातोपाटीसँग गरेको कुराकानीको सम्पादित अंश ।

‘नेपाल आइडल सिजन–४’ को विजेता हुनुभयो । कस्तो अनुभूति भइरहेको छ ?
– एकदमै खुसी छु । धेरै मानिसको साथ र सपोर्टले मैले सफलता प्राप्त गरेको हो । आफ्नो गाउँ, ठाउँ मात्र नभर देश तथा विदेशका सबै नेपाली दाजुभाइको मलाई सहयोग रह्यो । त्यो हिसावले आफूलाई भाग्यमानी सोच्छु ।
लाखौ नेपालीले देख्ने सपना हो नेपाल आइडलको उपाधि । त्यो सपना आज मेरो पुरा भएको छ । उपाधिले मलाई एक किसिमको जिम्मेवारी थपिदिएको छ । यस अगाडिको जस्तो मिहिनेत गरेर मैले अवको दिनमा हुँदैन र पुग्दैन । त्यसैले अहिले खुसी र हर्षित त छु नै । साथै, जिम्मेवारी बहनको भारी पनि बोक्दैछु ।

विजेता बन्छु भन्ने लागेको थियो त ?
नेपाल आइडलको मञ्चमा उपाधिका लागि यो मेरो चौथो प्रयास थियो । यस अगाडिका पहिलो, दोस्रो र तेस्रो सिजनमा पनि म सहभागी थिएँ । पहिलोदेखि तेस्रोसम्म म भोटिङ सिजन अगाडि नै आउट भएको थिएँ । यो सिजनमा कम्तिमा पनि भोटिङ राउण्डसम्म पुगेर भोट माग्ने इच्छा थियो । साथीहरुसँग पनि एक पटक भोट माग्न पाए सपना पुरा हुन्थ्यो भन्थेँ । नभन्दै यसपाली म भोटिङ राउन्डमा पुगे । एकपटक भोट मागें । भोट माग्दा माग्दा फाइनलसम्म पुगेर उपाधि समेत जितें ।

केले विजेता बनायो जस्तो लाग्छ ?
– पहिलो कुरो त मेरो मिहिनेत नै हो । मैले निकै मिहिनेत गरेको थिएँ । अर्काे कुरो कुनै पनि मानिसले तन, मन, धन सबै कुरो लगाएर एउटा क्षेत्रमा निरन्तर मिहिनेत गर्छ भने एकदिन उ सफल हुन्छ । त्यसको उदाहरण म भएको छु अहिले । यदि पहिलो सिजनको असफलतापछि म हराएको भए वा फेरि प्रयास नगरेको भए, धैर्य नराखेको भए अहिले कहाँ उपाधि जित्न सक्थे र ?

यस अगाडिको सिजनका तुलनामा चौथो सिजनको चर्चा केही कम भएको हो ?
– पक्कै हो । त्यो मैले पनि महसुस गरेको बिषय हो । त्यो हुनमा पहिलेको तुलनामा अहिले रियालिटी शोहरु धेरै बढेकाले पनि हो । पहिले नेपाल आइडल एउटा मात्र थियो । अहिले धेरै भएकोले दर्शक सबैतिर बाँडिएका छन् ।

अबको यात्रामा के कस्ता चुनौती देख्नु भएको छ ?
– हिजो अस्तिका भन्दा धेरै चुनौती छ । विजेता भएपछि के गर्ने, कसरी अगाडि बढ्ने भन्ने चिन्ता लागेको छ । दर्शक श्रोताहरूले अहिले एकदमै रुचाउनु भएको कारणले विजेता हुन सफल भएँ । उहाँहरुलाई मैले के कोसेली दिने भन्ने कुरो मनमा खेलिरहेको छ । राम्रो गर्नुपर्ने, फरक गर्नुपर्ने र धेरैको मन राख्नुपर्ने प्रेसर महसुस गरेको छु ।

थप
भूपेन्द्र थापामगर बने नेपाल आइडल सिजन–४
​गाउन कहिलेदेखि थाल्नु भएको थियो ?
– सानैदेखि गाउँथे । परिवारमा आमा, मामाहरु पनि राम्रो गाउनुहुन्थ्यो । त्यो माहोलले मैले सानैदेखि गाउँथे । सानोमा घरमा दिदीको साथीहरु आउँदा गीत गाउन लगाएर उपहार दिन्थे । सन् २०१६ बाट भने म व्यावसायिक रुपमा गायनमा होमिएको थिएँ ।

गीत पनि बाहिर ल्याउनु भएको छ कि ?
– पहिले मैले दुईटा गीत ल्याएको थिएँ । त्यसको अलावा कभर भर्सनमा पनि गाएको छु ।

कस्ता गीतसंगीत मनपर्छ ?
– गीत संगीत भनेको एउटा फिलिङ हो । यो मुडमा भर पर्छ । लोकदोहोरी, आधुनिक, पप, रक, र्‍याप सबै प्रकारको सुन्छु ।

भविष्यको योजना के छ ?
– निरन्तर संगीत फिल्डमै लाग्ने हो । यस अगाडि पनि मैले संगीतबाहेक केही सोच्दिन थिएँ । एक पटक जागिर खाएँ तर जागिरको कारणले संगीतबाट ढाटा रहनुपर्ने भएकाले जागिर छाडें । अब चौबीसै घन्टा संगीतमा खटिन्छु ।

बुबा आमाको सपना सांगीतिक क्षेत्र ल्याउने थियो त ?
–छोराले संगीतमा केही गरोस् भन्ने बुबा आमाको पनि सपना छ । उहाँहरुको पूर्ण सपोर्टले गर्दा आज मैले सफलता हात पारेको छु । म असफल भएपछि उहाँहरुले रोकतोक गरेको भए आजको सफलता कसरी मिल्थ्यो र ? सुरुमा नेपाल आइडलमा आउन पनि आमाले नै हौस्याएको हो ।

नेपाल आइडलको मञ्चलाई कसरी हेर्नु भएको छ ?
– नेपाल आइडल मेरो मन, मुटु हो । आइडलको विजेता हुने सपना मेरो पहिलेदेखि नै थियो । त्यसैले पनि पटक पटक असफलतामा पनि निरन्तरता दिएँ । निरन्तर लाग्नु भनेको सफलता प्राप्त गर्नु हो ।

नेपाल आइडलमा सहभागी हुन चाहनेलाई के भन्नुहुन्छ ?
– नेपाल आइडल एउटा उपर्युक्त प्लेटफर्म हो । यसका लागि राम्रो तयारी गरेर आउनु होला । एकपटक असफलता मिल्यो भन्दैमा निराश नहुनुहोला । निरन्तर लागि रहनुहोला । सफलता अवश्य मिल्छ ।

के कारणले नेपाल आइडल रोजाइमा पर्यो ?
– गायनको संघर्षको क्रममा जो कोही पनि एउटा राम्रो प्लेटफमको खोजीमा हुन्छ । पहिलो सिजनको नेपाल आइडल एकदमै भब्य थियो । त्यो देख्दा यो प्लेटफर्मले मेरो भविष्य बन्छ भनेर होमिए । पटक पटक सहभागी हुँदा पनि म कहिल्यै माइनस भइनँ । केही न केही सिक्न पाएँ ।

यस अघिका रियालिटी शोका धेरै विजेता त्यतिकै हराएका छन् नि ?
– नेपाल एउटा सानो देश हो । तर बिभिन्न क्षेत्रका सेलिब्रेटी धेरै छन् । त्यसैले पनि यहाँ प्रतिस्पर्धा धेरै छ । त्यसैले जसले यहाँ नयाँ केही दिन सक्छ । त्यो टिक्छ, अन्य हराउँछन् । समय परिस्थिति बुझेर नयाँ केही दिन सकियो भने हराउनु पर्दैन । अर्काे कुरो श्रोताले कतिबेला के रुचाउनुहुन्छ भन्नेमा पनि भर पर्छ ।

यो समाचार आजको रातोपाटिमा छ ।