कैलालीमा युवकको टाउको छिनाल्ने मनोजको भिडियो : क्रिमिनल हो हामी क्रिमिनल

काठमाडौं – कैलालीको जानकी गाउँपालिका–९ का २५ वर्षीय अरुण दासको हत्या प्रकरणमा प्रहरीले मुख्य अभियुक्त भनिएका मनोज भण्डारीलाई पक्राउ गर्न सकेको छैन ।

गएको पुस पहिलो साता दासको घाँटी रेटेर टाउको छिनालेको अवस्थामा शव फेलापरेको थियोे । स्थानीय अमरावती सामुदायिक वनमा नग्न अवस्थामा घाँटी रेटेर टाउको अलग पारिएको अवस्थामा शव फेलापरेको हो ।

हत्यापछि अरुणलाई आफूहरूले मारेको भन्दै मनोज भण्डारी नामका एक व्यक्तिले आफूनिकट एकजनालाई गरेको टेलिफोन संवाद सार्वजनिक भएको थियो । सोही अडियोको आधारमा प्रहरीले अनुसन्धान अघि बढाएको थियो ।

मनोजले आफूले अरुणलाई मारेको भनिएको अडियोमा ‘एक थप्पडको बदला लिन अरुणको हत्या’ गरिएको आशय व्यक्त गरिएको पाइएको थियो । प्रहरी अधिकारीहरूका अनुसार दासले लागुऔषध चोरेको हुन सक्ने आशंकामा हत्या गरिएको हो ।

अरुणले एक व्यक्तिलाई फोन गरेका थिए । सोही रेकर्ड बाहिरिएको थियो । घटनामा संलग्न मनोजसहितका सबै आरोपित भारतमा लुकेर बसेको प्रहरी दाबी छ ।

उनीहरूले आफ्नो अडियो बाहिर ल्याएको भन्दै एके नामका एकजनालाई सामाजिक सञ्जालको लाइभ भिडियोबाट ज्यान मार्ने धम्की दिएका छन् । भिडियो घटनाकै समयको भएको र भिडियोलाई पनि प्रहरीले प्रमाणको रूपमा लिएको छ । सो भिडियो प्रहरीका अधिकारी र केही सीमित व्यक्तिसँग मात्रै रहेको अधिकारीहरू दाबी गर्छन् ।

बाह्रखरीलाई प्राप्त भिडियोमा मनोजसहित चारजना देखिन्छन् । उनीहरू एक किराना पसलमा छन् । जहाँ मनोज सबैभन्दा बढी बोलेका छन् । एके नामका व्यक्तिलाई उनीहरूले अश्लील गाली गर्दै ज्यान मार्नेसम्मको धम्की दिएका छन् ।

प्रहरीले एके नामका व्यक्तिका बारेमा बताउन चाहेको छैन । भिडियोमा मनोजले भनेका छन्, “यी फुच्चेफाच्चीका लागि गोली खर्च गर्छन् ? तिमीहरूलाई यति सहज मृत्यु दिँदैन । तड्पाइतड्पाइ नमारे मेरो नाम मनोज होइन एके ।”

उनले आफू शान्त बसेको बताउँदै ‘तुफान आउनेवाला’ रहेको पनि भिडियोमा बोलेका छन् । उनले अगाडि भनेका छन्, “समुद्र तब शान्त हुन्छ जब तुफान आउनेवाला हुन्छ । एके, तेरा बाउ मारेको छु मैले कि श्रीमती मैले लगेको छु ? तँ एउटा मोबाइल चोरेर लुकेर बसेको छस्, दाइले के गर्‍या छ था’ होला नि ! क्रिमिनल हो हामी क्रिमिनल !”

प्रहरी अधिकारीहरूका अनुसार मनोज र दास एउटै समूहका साथीहरू हुन् । उनीहरू सँगैसँगै खाना खाने, घुम्ने र मिल्ने साथी रहेको खुलेको छ । निम्नवर्गीय परिवारका दास र मनोजको समूह लागुऔषध कारोबारी र प्रयोगकर्ता समेत हुन सक्ने प्रहरीको अनुमान छ ।