एमसीसीमा गगन थापाको प्रस्ताव : संशय भएका बुँदाहरुको ‘व्याख्यात्मक घोषणा’ गरौं

८ फागुन, काठमाडौं । अमेरिकी सहयोग परियोजना एमसीसी अनुमोदन गर्ने कि नगर्ने भन्ने विवादले सत्तारुढ गठबन्धन संकटमा छ । सरकारको नेतृत्व गरिरहेको नेपाली कांग्रेस अनुमोदनको पक्षमा छ भने सत्तारुढ माओवादी केन्द्र र एकीकृत समाजवादी पार्टीका नेताहरु संशोधनको पक्षमा छन् ।

नेपालको एमसीसी विवादमा चीन समेत मुछिएर नेपाल भूराजनीतिक भूमरीमा पर्ने खतरा बढेपछि सत्तारुढ कांग्रेसका महामन्त्री गगनकुमार थापाले संसदबाट एमसीसी अनुमोदनसँगै सबैखाले संशय मेट्ने गरी व्याख्यात्मक घोषणा गर्ने प्रस्ताव अघि सारेका छन् । उनी भन्छन्, ‘यसो गर्दा जुन-जुन दफामा स्पष्ट हुन खोजेको हो, त्यसमा हाम्रो बुझाइ यो हो भनेर घोषणा गर्छौं, त्यसलाई एमसीसीले पनि स्वीकार गरेपछि सम्झौता कार्यान्वयनमा जान्छ ।’

यसबारे छलफल गरेर छिट्टै निकास दिन सकिने उनले बताए । निकासको उपायबारे छलफल पनि नगर्ने, संशोधन हुनुपर्छ मात्र भन्ने हो भने मनमा कपट रहेछ, आफूले लगाउने राष्ट्रिय हितको चश्मा र अरुका चश्मा फरक रहेछ भन्ने निष्कर्ष निकाल्नुपर्ने उनी बताउँछन् ।