नम्रता श्रेष्ठ र दयाहाङ राईको फिल्म ‘वरदान’ युट्युबमा हेर्न पाइने

नम्रता श्रेष्ठ र दयाहाङ राईको मुख्य भूमिका रहेको सर्ट फिल्म ‘वरदान’ बिहीबार सार्वजनिक भएको छ।

‘वरदान’ दीपेन्द्र लामाले लेखन तथा निर्देशन गरेका हुन्। २४ मिनेट लामो फिल्म शुभ मिडिया होमले निर्माण गरेको हो।

आत्महत्या रोकथामको विषयलाई उठाएको फिल्मले मानसिक स्वास्थ्यको संवेदनशीलतालाई समेटेको छ।

लामो समयपछि फिल्ममा देखिएकी अभिनेत्री नम्रता श्रेष्ठले यस्तो विषयमा फिल्म बन्नु सकारात्मक भएको बताइन्।

डिप्रेसनबाट गुज्रिरहेका र आत्महत्याको जोखिममा रहेकालाई परामर्श दिने गरेको सुनाउँदै उनले भनिन्, ‘समस्यासँग जुधिरहेका मानिस र उनीहरूका अभिभावक तथा साथीभाइहरूलाई सजग गराउन यस्ता फिल्मले धेरै योगदान दिनसक्छ।’

२०७६ सालको ‘जायरा’ पछि नम्रताले अभिनय गरेको फिल्म यही ‘वरदान’ हो। विषयवस्तु चित्त बुझेर आफूले यस फिल्ममा काम गरेको नम्रता बताउँछिन्।

लकडाउनको समयमा म्युजिक भिडिओमा धेरै काम गरेका अभिनेता दयाहाङ राईले यस फिल्ममा काम गर्दा फरक अनुभव भएको सुनाए।

फिल्ममा नम्रताको मुख्य भूमिका भएको भन्दै राईले उनलाई सघाउँदा खुसी लागेको टिप्पणी गरे।

लकडाउनको समयमा आत्महत्या बढेको समाचार पढेर कथा लेख्न बाध्य भएको निर्देशक दीपेन्द्र लामाले सुनाए। विदेशमा आत्महत्या रोकथामबारे धेरै सर्ट फिल्म बन्दा नेपालमा पनि यससम्बन्धी फिल्म बन्नुपर्ने लागेर काम गरेको उनले बताए।

लामाले फिल्म हेरेर दुई जनाको ज्यान बचाउन सके पनि आफ्नो कामको सफलता मान्ने विचार व्यक्त गरे।

‘वरदान’मा शैलेन्द्र डी कार्कीको छायांकन, निमेष श्रेष्ठको सम्पादन, शैलेश श्रेष्ठको संगीत र उत्तम न्यौपानेको साउन्ड डिजाइन छ।

श्रेष्ठ र राईसँगै लुनिभा तुलाधर, प्रवीण खतिवडा, जयनन्द लामा, पुष्कर गुरुङ, शारदा गिरी, सुनिता श्रेष्ठ र कृष्णभक्त महर्जनले पनि अभिनय गरेका छन्।