सुदूरपश्चिममा लोकसेवाकाे विज्ञापन खोल्न फेरि ढिलाई हुने, कारण यस्तो

धनगढी: सुदूरपश्चिम प्रदेशमा लोकसेवा आयोगको विज्ञापन गर्न प्रदेश सरकारले सक्रियता देखाएको छ। संगठन तथा व्यवस्थापन सर्वेक्षण अर्थात ओएनएमको प्रक्रिया टुङ्ग्याएर लोक सेवाको विज्ञापन खोल्न प्रदेश सरकारले सक्रियता देखाएको हो। प्रदेशको ओएनएमबारे टुङ्गो लगाउन मुख्यमन्त्री तथा मन्त्रिपरिषद्को कार्यालयका सचिवको नेतृत्वमा एक कार्यदल गठन गरेर कार्यविधि बनाउने काम भइरहेको बताइएको छ। कार्यदलले तीन महिनाभित्र कार्यविधि तयार गरेर ओएनएम सम्बन्धी काम गरिने बताएको छ।
सरकारले संगठन तथा व्यवस्थापन सर्वेक्षण अर्थात ओएनएम नगरेको कारण लोकसेवा आयोगले विज्ञापन गर्न सकेको थिएन। तर सुदूरपश्चिम सरकार मातहतका मन्त्रालय, निकाय तथा कार्यालय र स्थानीय तहमा स्वीकृत दरबन्दीको झण्डै ५० प्रतिशत पद रिक्त हुँदा सरकारको कार्य सम्पादन नै प्रभावित भएको बताइने गरेको छ। अन्य प्रदेशमा प्रदेश लोकसेवा आयोगले कर्मचारी समायोजन ऐन २०७५ अनुसार रिक्त दरबन्दीमा पदपूर्तिका गरेको भए पनि सुदूरपश्चिम प्रदेशमा कर्मचारी व्यवस्थापन सर्वेक्षण नगरिएको भन्दै मुख्यमन्त्री तथा मन्त्रिपरिषदको कार्यालयले विज्ञापनका लागि माग आकृति फाराम भर्न नसकेको बताउदै आएको थियो। तर प्रदेश सरकारले कर्मचारी व्यवस्थापन सर्वेक्षण(ओएनएम) का लागि कार्यविधि बनाउने काम गरिरहेको मुख्यमन्त्री तथा मन्त्रीपरिषदको कार्यालयका सचिव ढुण्डीप्रसाद निरौलाले दिनेशखबरलाई बताए। ‘संगठन तथा व्यवस्थापन सर्वेक्षण गर्न कार्यदल बनेको छ। मन्त्रालयगत छलफल गरेर कार्यविधिबारे टुङ्गो लगाइने छ’ उनले भने।
मुख्यमन्त्री कार्यालयका सचिव ढुण्डीप्रसाद निरौलाको संयोजकत्वमा गठित कार्यदलले लोकसेवाको विज्ञापन खोल्न कर्मचारी व्यवस्थापन सर्वेक्षणका लागि कम्तीमा एक महिना र बढीमा तीन महिना लाग्ने जनाएको छ। उनले भने, ‘कार्यविधि बनेपछि त ओएनएम सहजै बन्छ नि। सबै कुराको व्यवस्थापन मिलेपछि चाँडोमा एक महिना र ढिलोमा तीन महिनाभित्र सबै काम सकिन्छ।’
सुदूरपश्चिम प्रदेश सरकारले कर्मचारी अभाव भएको कारण सरकारको कामकारबाही प्रभावकारी हुन नसकेको बताउने गरेको छ। लोकसेवा आयोगमार्फत कर्मचारी भर्ना गर्न प्रदेश सरकारले कुनै काम गर्न नसकेको आरोप लोकसेवाको तयारीमा रहेका युवाले लगाउँदै आएका छन्।
प्रदेश लोकसेवा आयोगले भने लोकसेवा खोल्न बाधक देखिएका ओएनएम, प्रदेश तथा स्थानीय तहका कर्मचारी दर्ता किताब खानाको सञ्चालन र माग आकृति फाराम भरेर आउने बित्तिकै विभिन्न पदको विज्ञापन गर्ने जनाएको छ।