कोल्टीमा पसल व्यवसायी पौडल दम्पतीद्धारा विद्यालय पोशाक र शैक्षिक सामाग्री सहयोग

सर्मिला रोकाया/ बाजुरा :-बाजुराको बुढीनन्दा नगरपालिका वडा नं दुई कोल्टीमा रहेको बुढीनन्दा आधारभुत विद्यालयका विद्यार्थीका लागि पोशाक र शैक्षिक सामाग्री सहयोग गरिएको छ । विगत लामो समय देखि शैक्षिक पेशामा आवद्ध रहि रिटाएर हुनुभएका पसल व्यवसायी वद्री पौडेल र उहाँका धर्मपत्नी सावित्री पौडेलले विद्यार्थीका लागि सो सामाग्री सहयोग गर्नुभएको हो । पर्वतको फलेवास नगरपालिका वडा नं ५ चितेपानी जन्मेर बाजुरा कर्मथलो बनाउनु भएका पौडेल दम्पतीले विद्यार्थीहरुका लागि पोशाक र शैक्षिक सामाग्री सहयोग गर्नुभएको विद्यालय श्रोतले जनाएको छ ।

करिब २० वर्ष देखि बाजुराको कोल्टी क्षेत्रमा पौडेल जनरल स्टोर स्थापना गरि व्यवसाय सञ्चालन गर्दै आउनुभएका दम्पतीले १५ जना विद्यार्थीका लागि २ थान विद्यालय पोशाक, ६२ वटा औजार वक्स र स्वास्थ्य सुरक्षाका लागि मास्क सहयोग गर्नुभएको हो । बुढीनन्दा आधारभुत विद्यालयमा अध्ययनरत दलित, जनजाती तथा आर्थिक अवस्था कमजोर भएका विपन्न परिवारका बालबालिकाहरुलाई विद्यालय पोशाकका कारण विद्यालयमा अध्ययन अध्यापनमा बाधा नहोस भन्ने उदेश्यले सो सामाग्री सहयोग गरिएको प्रधानाध्यापक विरर्जन शाहीले जानकारी दिनुभएको छ । शैक्षिक पेशामा २० वर्ष आवद्ध रहिरहदाँ कोही अभिभावकले आर्थिक अवस्था कमजोर हुँदा आफ्ना छोराछोरीलाई अध्यापनका लागि विद्यालय सम्म पुर्याउन नसकेको तितो अनुभव सम्झीदै उनीहरु सजिलै विद्यालय सम्म पुगोस भनेर सो सामाग्री सहयोग गर्नुभएको प्रधानाध्यापक शाहीले बताउनुभएको छ ।

विद्यालयले एक कार्यक्रमको आयोजना गरि पौडेल दम्पती परिवारको सहभागितामा सो सामाग्री वितरण गरेको बताइएको छ । शिक्षक अभिभावक संघका अध्यक्ष विर्ख बहादुर कार्कीको अध्यक्षतामा सञ्चालन भएको कार्यक्रममा शिक्षक शिक्षिकाहरुले पौडेल दम्पती परिवारलाई फुलमाला, अविर लगाएर सहयोग गरेकोमा धन्यवाद व्यक्त गर्दै आगामी यात्राका लागि शुभकामना पनि प्रदान गरेका थिए । सहयोगी भावना भएका पौडेल दम्पतीले कोल्टीमा रहेको विद्यालयमा मात्र नभएर अन्य आर्थिक अवस्था कमजोर भई एक जोर कपडा सम्म फेर्न नसक्ने परिवारहरुलाई पनि सहयोग गर्दै आउनुभएको बताइएको छ ।