अपाङ्गता भएका व्यक्तिको ३० औँ अन्तर्राष्ट्रिय दिवस बाजुरामा पनि मनाइयो

सर्मिला रोकाया/ बाजुरा काेल्टी :- आज अपाङ्गता भएका व्यक्तिको ३० औँ अन्तर्राष्ट्रिय दिवस बाजुरामा पनि मनाइएको छ । ’समावेशी, सुलभ र दिगो, कोभिड–१९ पछिको विश्वतर्फ अपाङ्गता भएका व्यक्तिको नेतृत्व र सहभागिता’ भन्ने नारा सहित विश्वभर मनाइएको हो । नेपालमा भने ‘हाम्रो प्राथमिकताको आधार, अपाङ्गता भएका व्यक्तिहरूको अधिकार’ भन्ने राष्ट्रिय नाराका साथ मनाइएको छ । संयुक्त राष्ट्र सङ्घले सन् १९८२ को डिसेम्बर ३ तारिखमा अपाङ्गता सम्बन्धी विश्व कार्ययोजना पारित गरेपछि सन् १९९२ देखि यो दिवस मनाउन थालिएको हो । सोही अनुसार बाजुराको बुढीनन्दा नगरपालिकाले पनि आज कोल्टी बजारमा र्याली प्रर्दशन गर्दै दिवस मनाएको छ । बुढीनन्दा नगरपालिकाको आयोजना र आइएनफ नेपाल र पीसविन बाजुराको आर्थिक सहयोगमा आज अपाङ्गता भएका व्यक्तिको ३० औँ अन्तर्राष्ट्रिय दिवस मनाइएको हो ।
कोल्टी बजारमा र्याली प्रर्दशन गर्दै शिवमिलन पार्कमा आमसभामा परिणत भएको कार्यक्रममा अपाङ्गता भएका व्यक्ति तथा अन्यको सहभागिता रहेको थियो । महिला तथा बालबालिका अधिकृत गंगा गिरीको अध्यक्षतामा सम्पन्न भएको कार्यक्रममा बुढीनन्दा नगरपालिका वडा नं छ का वडा अध्यक्ष दल बहादुर भाट प्रमुख अतिथी रहनुभएको थियो । आइएनएफ नेपाल बाजुराका टोली प्रमुख नरदिप ओडले सञ्चालन गरेको कार्यक्रममा अपाङ्गता भएका व्यक्तिलाई सरसफाइका सामाग्री वितरण गरिएको बताइएको छ । अपाङ्गता भएकाहरुले भोग्नु परेको समस्यामाथि छलफलसँगै चुनौतीको समाधान निकाल्न, अपाङ्गता सम्बन्धी जागरण फैलाउन र अपाङ्गता भएका व्यक्तिको अधिकार सुनिश्चित गर्ने उद्देश्यका साथ यो दिवस मनाउने गरिएको बताइन्छ ।
नेपालमा अपाङ्गता भएका व्यक्तिको सङ्ख्या कति छ भन्ने यकिन तथ्याङ्क छैन । तर उनीहरु कहाँ–कस्तो अवस्थामा रहेका छन् भन्ने कुराको जानकारी समेत नभएको राष्ट्रिय अपाङ्ग महासङ्घले जनाएको छ । महासङ्घका अनुसार २०६८ सालको जनगणना अनुसार नेपालमा अपाङ्गता भएका व्यक्तिहरुको सङ्ख्या साढे पाँच लाख छ ।