पिसिआर रिपोर्ट नहुँदा नेपाली महिला टिमको बंगलादेशमा फ्लाइट छुट्यो, बसबाट स्वदेश फर्कने

काठमाडौं, नेपाली महिला क्रिकेट टिम बिहीबार बंगलादेशबाट स्वदेश फर्किने कार्यक्रम थियो। तर व्यवस्थापन फितलो हुँदा नेपाली टिमको बंगलादेशको राजधानी ढाकाबाट नेपाल आउने फ्लाइट छुटेको छ।

विदेशबाट नेपाल फर्कने सबै यात्रुका लागि पिसिआर रिपोर्ट अनिवार्य छ। ७२ घन्टाअघिसम्मको पिसिआर रिपोर्ट देखाएर मात्र नेपाल आउन पाइन्छ।
तर बिहीबार नेपाल फर्कन लागेको नेपाली टिम पिसिआर रिपोर्ट नबोकी बंगलादेशको राजधानी ढाकाको अन्तर्राष्ट्रिय विमानस्थल पुगेको थियो। विमानस्थलका कर्मचारीले नेपाली टिमलाई भित्र छिर्न नदिएको नेपाल क्रिकेट संघ ९क्यान० का एक केन्द्रीय सदस्यले सेतोपाटीलाई जानकारी दिए। उनका अनुसार नेपाली टिमको पिसिआर परीक्षण नै गरिएको थिएन।

नेपाली टिम बिहान ९, १५ मा विमान बंगलादेशबाट नेपाल फर्कने क्रार्यक्रम थियो। नेपाली टिमको प्रशिक्षक जगत टमाटा र व्यवस्थापकमा क्यानकी केन्द्रीय सदस्य जयन्ती भट्ट बंगलादेश गएका थिए।
विमान बंगलादेशले सातामा दुई दिन बिहीबार र शनिबार ढाकाबाट काठमाडौं उडान गर्छ। यसका नेपाल फर्कन अझै दुई दिन कुर्नुपर्ने भएपछि नेपाली टिम बसबाट स्वदेश फर्कने भएको क्यानले जनाएको छ। क्यानका अनुसार नेपाली टिम आज साँझसम्ममा नेपाल आइपुग्नेछ।

नेपाली टिम आइसिसी वुमन्स टी(२० विश्वकप छनोट प्रतियोगिताको तयारी गर्न कात्तिक १८ मा बंगलादेश गएको थियो। त्यहाँ स्थानीय टिमसँग तीन अभ्यास खेल खेलेको नेपालले दुई खेलमा जित हात पारेको थियो। नेपालले आगामी १९ देखि २९ नोभेम्बरसम्म युएईमा एसिया क्षेत्रको विश्वकप छनोट प्रतियोगिता खेल्ने तय छ।
त्यसअघि नेपालले कतारमा अभ्यास गर्नेछ। नेपाली टिम पर्सी कतार जाने कार्यक्रम छ। छनोटका लागि रूबिना क्षेत्रीको कप्तानीमा १४ सदस्यीय टिम घोषणा गरेको थियो।
टिममा डली भट्ट, सीता रानामगर, करूणा भण्डारी, इन्दु बर्मा, सरिता मगर, ज्योति पाण्डेय, सरस्वती चौधरी, काजल श्रेष्ठ, सबनम राई, कविता कुँवर, अप्सरी बेगम, कविता जोशी र सङ्गीता राई छन्। सरस्वती जिएम, रोमा थापा, अस्मिना कर्माचार्य र ममता चौधरीलाई वैकल्पिकमा राखिएको छ।
वुमन्स टी २० विश्वकपको एसियाली छनोटमा नेपालले घरेलु टोली युएई, भुटान, कुवेत, हङकङ र मलेसियासँग प्रतिष्पर्धा गर्नेछ। छनोटबाट एक टिम विश्व छनोटमा पुग्नेछ।