एमाले बडिमालिका नगरको समितिमा युवा अनुहार, सहमतिमा नेतृत्व चयन

बाजुरा:- नेकपा एमाले बडिमालिका नगर कमिटीले नयाँ नेतृत्व पाएको छ । धर्मराज पाध्याय अध्यक्ष रहने गरी ७५ सदस्यीय नयाँ समिति चयन गरिएको निर्वाचन समिति सदस्य अंगत महतले बताएका छन् ।
प्रथम नगर अधिवेशनबाट सर्वसम्मत नेतृत्व चयन गरिएको नगर इन्चार्ज एवं नेकपा एमाले नेता अमर खड्काले बताएका छन् । नगर कमिटीमा अध्यक्ष धर्मराज पाध्याय, उपाध्यक्ष विमला थापा, सचिव राजेश पायल विक, सहसचिव कर्ण विक र दिलीप रावल चयन भएका छन् ।
नगर कमिटीको पदाधिकारी तहमा युवा अनुहार देखिएका छन् । प्रेस चौतारीका केन्द्रीय सदस्य समेत रहेका धर्मराज पाध्याय नेतृत्वको टिममा अधिकांश युवाहरु नै समेटिएका छन् । पाध्याय बडिमालिका नगरपालिका ७ का वडा अध्यक्ष पनि हुन् ।
सचिव राजेश पायव विक जिल्लाकै कान्छा नगर सचिव बनेका छन् । अनेरास्ववियुका केन्द्रीय सदस्य बनिसकेका विक कलाकारिता क्षेत्रमा सक्रिय छन् । विक बडिमालिका नगरपालिका ९ का वडा कमिटी अध्यक्ष भइसकेका हुन् ।
अध्यक्षमा उम्मेदवारी दिएका जंग विक, सूर्यकिरण विक, अंगत रावलले फिर्ता लिएपनि पाध्याय सर्वसम्मत भएका हुन् । भने सचिवमा पनि अन्तिम चरणमा राजेश पायल विक र जया विक उम्मेदवार थिए । जया विकले राजेश पायलको नाममा सहमति दिएपछि सर्वसम्मत नेतृत्व नगर कमिटी गठन गरिएको छ ।