एमसीसीका उपाध्यक्षलाई कालो झण्डा देखाउने हेमराज थापा सहितका युवा प्रकाउ

काठमाडौं। अमेरिकी अनुदान मिलेनीयम च्यालेन्ज कर्पोरेशन (एमसीसी) परियोजनाका उपाध्यक्ष फतिमा सुमारलाई कालो झण्डा देखाउने विद्यार्थी नेता हेमराज थापा कैलाश कटुवाल, नरेन्द्र देउजा लगायतका व्यक्तिहरुलाई प्रहरीले पक्राउ गरेको छ।

नेपालमा निकै विवादास्पद रहेको उक्त परियोजनाबारे विभिन्न राजनीतिक दल र आम नगरिकस्तरबाट विरोध हुँदै आइहरेको छ। एमसीसीलाई रणनीतिक दबाब दिएर पास गराउने रणनीति सहित नेपाल आएका एमसीसीका उपाध्यक्षलाई अमेरिकी दुतावास अगाडी कालो झण्डा देखाउन गएका थापाले आफूहरुलाई पक्राउ गरेको भन्दै सामाजिक सञ्जाल फेसबुक मार्फत उल्लेख गरेका छन्।

उपाध्यक्ष फतिमा सुमारले नेपाल बसाईका क्रममा एमसिसीको बारेमा प्रधानमन्त्री शेरबहादुर देउवा, सत्ता गठबन्धनका नेताहरू र प्रमुख विपक्षी दलका नेता केपी शर्मा ओलीसँग भेट्नेछन् ।

अमेरिकी विदेश मन्त्रालयले डेढ महिना अघि सार्वजनिक गरेको ‘२०२१ इन्भेस्टमेन्ट क्लाइमेट स्टेटमेन्ट्स स् नेपाल’ प्रतिवेदनमा एमसीसी सम्झौता संसद्बाट अनुमोदन गर्न ढिलाइ हुनु सम्भाव्य लगानीकर्ताका लागि राम्रो संकेत नभएको भन्दै असन्तुष्टि व्यक्त गरेको थियो ।

नेपालले ऊर्जा र सडक पूर्वाधार निर्माण गर्न ५ सय मिलियन अमेरिकी डलर अनुदान पाउने गरी एमसीसीसँग २०७४ भदौ २९ मा सम्झौता गरेको थियो । चार वर्ष पुग्नै लाग्दा पनि सम्झौता कार्यान्वयन नभएपछि अमेरिका असन्तुष्ट छ ।

२०७७ असार १६ गतेसम्म सबै प्रक्रिया पूरा गरेर सम्झौता कार्यान्वयनमा जाने नेपालको प्रतिबद्धता थियो । तत्कालीन सत्तारूढ नेकपाको आन्तरिक विवादले सम्झौता अनुमोदन प्रक्रिया अघि बढाइएको थिएन भने पछिल्लो समय यो विषय प्राथमिकताको केन्द्रभन्दा बाहिर थियो ।