निर्वाचन कार्यालयमा किन उपस्थित भएनन् मन्त्री सोडारी र सांसद तामाङ

1. धनगढी : सुदूरपश्चिम प्रदेशका १० प्रदेश सांसद नेकपा एमाले पार्टी छाड्दै नवगठित नेकपा (एकीकृत समाजवादी) पार्टीको पक्षमा सनाखत गर्न प्रदेश निर्वाचन कार्यालयमा पुगेका छन्।

नेकपा एमालेको तर्फबाट प्रदेशसभा सदस्य भएका उनीहरु निर्वाचन कार्यालय धनगढीमा उपस्थित भएर नवगठित नेकपा (एकीकृत समाजवादी) पार्टी रोज्दै सनाखत गर्न थालेका हुन्। आजै सनाखतको तयारीमा रहेका भौतिक पूर्वाधकार विकासमन्त्री दीर्घबहादुर सोडारी र प्रदेश सांसद तारा लामा तामाङ भने निर्वाचन कार्यालयमा उपस्थित भएनन्।
मन्त्री सोडारीले आफूसहितका ३/४ जना सांसदले भोलि सनाखत गर्ने बताए। ‘अन्य सांसदसंग पनि छलफल जारी रहेकोले हामीलाई ढिलाई भएको हो, हामी भोलि गर्छाै,’ उनले भने।
यता प्रदेश सांसद तामाङले पनि २२ गतेसम्म पार्टी रोज्ने सुविधा भएको बताउँदै भने, ‘आज उपस्थित हुन सकेनौ। २२ गतेसम्म सनाखत जहिले गरे पनि हुन्छ।’ आजै सनाखतका लागि निर्वाचन कार्यालय पुग्ने तयारीमा रहेकी राज्यमन्त्री अर्चना गहतराज पनि उपस्थित भइनन् ।
आन्तरिक मामिला तथा कानुनमन्त्री पूर्णा जोशीले ४ जना सांसदको सनाखत भोलि हुने जानकारी दिइन्। आज मन्त्री जोशीसहित सामाजिक विकास मन्त्री लालबहादुर खड्का, पूर्वमन्त्री माया भट्ट, राज्यमन्त्रीहरु चुनकुमारी चौधरी, मनाकुमारी साउँद, प्रमुख सचेतक दुर्गा कुमारी कामी, कुलविर चौधरी, अमरबहादुर साउद, बलबहदुर सोडारी र सुशिला बुढाथोकीले माधव नेपालको नयाँ पार्टीको पक्षमा सनाखत गरेका छन्।