धनगढीको जाखोर ताल क्षेत्रमा व्यापक फडानी

धनगढी : कैलालीको धनगढीस्थित जाखोर ताल क्षेत्रमा रहेको वनस्पति उद्यानमै व्यापक रुख कटानी भएको छ। धनगढी उपमहानगरपालिकाको वडा नम्बर ७ मा रहेको जाखोर तालको उत्तरतर्फ रहेको वन क्षेत्रमा ढलेको सालका रुख पूरै काटेर लगिएको छ भने अन्य रुखसमेत काटेको पाइएको हो।

संघीय सरकार मातहतको वनस्पति कार्यालयको स्वामित्वमा रहेको वनमा ठूला रुख पनि काटिएका छन्। सिर्जना महिला सामुदायिक वन र देबहरिया सामुदायिक वनसँगै जोडिएको वन क्षेत्रमा वनस्पति कार्यालयको लापरबाहीले रुख कटान भएको देबहरिया सामुदायिक वन उपभोक्ता समितिका सचिव खगेन्द्र रानाले बताए। ञवनस्पति कार्यालयको स्वामित्वमा रहेको वनमा रुख काट्ने काम भएको छ,’ उनले भने, ‘हामीले वनमा आउनेहरूलाई रोक्ने प्रयास गर्यौँ तर स्थानीयले उल्टै हामीलाई गाली गर्छन्।’धनगढी सव डिभिजन वन कार्यालयले सिर्जना सामुदायिक वन निकै सानो भएकोले वनस्पति कार्यालयको स्वामित्वको संरक्षण गर्न नसिकएको र वन क्षेत्र सामुदायिक वनलाई हस्तान्तरण गरिए वन संरक्षण हुने दाबी गरेको छ। वनस्पति कार्यालयले वन संरक्षण गर्न नसक्दा त्यो क्षेत्रमा फडानी र चरीचरन बढेको तारानगर सव डिभिजन कार्यालयका सहायक वन अधिकृत जिसन कार्कीले जनाए।’त्यो वन क्षेत्र वनस्पति कार्यालयको अधिनमा छ। सिर्जना महिला सामुदायिक वनमा त्यो वन क्षेत्र समावेस गर्न प्रस्ताव वनस्पति कार्यालयमा पठाइएको छौं,’ उनले भने, ‘वनस्पति कार्यालयको वन क्षेत्र भएकोले संरक्षण उहाँले गर्न नसक्दा त्यो क्षेत्रबाट कयौं पटक हामीले पनि मान्छे लखेट्ने काम गरेका छौँ।’वनस्पति कार्यालय कैलालीले जाखोर ताल क्षेत्रमा स्थानीयले ढलेका रुख काटेको स्वीकार गरेको छ। स्थानीयले दाउराका लागि रुख काटेको भए पनि त्यो क्षेत्रबाट धेरै पटक बन्चरो र हसिँया बरामद गर्ने गरेको जनाएको छ। वनस्पति कार्यालयको स्वामित्वमा रहेको वनमा ढलेका रुखबाहेक अन्य कटान नभएको वनस्पति कार्यालयका प्रमुख गंगादत्त भट्टको दाबी छ। ‘हामीले त्यो क्षेत्रमा ढलेको रुख काटेको पाएका छौँ,’ उनले भने, ‘अन्य रुख काटेको जानकारी भएन। त्यहाँ निगरानी बढाउने छौँ।’जाखोर तालसँग जोडिएको उत्तरतर्फको वन क्षेत्रमा एक सय हाराहारीमा रुख भर्खरै कटान गरिएका देख्न सकिन्छ। वनमा ढलेका कुनै पनि रुख बाँकी छोडिएको छैन भने हुर्किन लागेका रुख विरुवा पनि काटिएको छ। कानूनअनुसार वन क्षेत्रमा अनुमति विना हातहतियार लगेर प्रवेश गर्न नपाइने भए पनि धनगढी बजारसँगै जोडिएको वन क्षेत्रमा सय बढी रुख काट्नुका साथै स्याउला, दाउरा, घाँस काट्ने र बाख्रा चराउने काम निर्वाध हुने गरेको छ।