वडा कार्यालयको भवन निर्माणले लियो गति

गौरब विष्ट ,जेठ १४,बाजुराः बुढीगंगा नगरपालिकाको वडा नं. ७ मा निर्माण हुन लागेको वडा कार्यालय भवनको निर्माण कार्यले गति लिएको छ।

लामो समयसम्म प्राविधिक र कानुनी जटिलताका कारण रोकिएको निर्माण कार्य अहिले पुनः सुरु भएको हो। नगरपालिकाको आर्थिक वर्ष २०७७-०७८ को नीति कार्यक्रम अनुसार वडा नं। ७ मा नयाँ कार्यालय भवन निर्माण हुन लागेको हो ।

२०७८ असोज १५ गते निर्माण सम्पन्न गर्ने गरि २०७७ चैत्र २५ गते उक्त भवन निर्माणको लागी ठेक्का सम्झौता भएको थियो ।१ करोड लागतमा निर्माण ठेक्काको जिम्मा लगिएकोमा के आर निर्माण सेवाले ६० लाख ८४ हजार ३ सय ८८ रुपैयामा निर्माण गरिरहेको छ । उक्त भवनको निर्माण २०७८ असोजमै सम्पन्न गरिसक्नु पर्ने भए पनि केहि विवादका कारण काम रोकिएको थियो । अबको केही महिना भित्रै उक्त भवनको निर्माण कार्य सम्पन्न गरिने के आर निर्माण सेवाले जनाएको छ।

भवन निर्माणका लागि प्रस्तावित जग्गा वडा कार्यालयको नाममा दर्ता नभएकाले काम अगाडि बढ्न सकेको थिएन। कानुनी प्रक्रियामा समय लागे पनि निरन्तर प्रयासपछि सो जग्गा हाल वडा कार्यालयको नाममा नामसारी भइसके पछि वडा कार्यालय भवनको निर्माण कार्यले गति लिएको वडा अध्यक्ष भुवन सिंह केसीले बताउनुभयो।

उनका अनुसार,नामसारी प्रक्रिया सम्पन्न भए लगत्तै निर्माण कार्य पुनः सुरु गरिएको र सोही अनुसार पहिलो तलाको ढलान कार्य सफलता पूर्वक सम्पन्न भएको ,भवन निर्माणको जिम्मेवारी लिएको निर्माण व्यवसायी कम्पनीले निर्धारित मापदण्ड अनुसार गुणस्तरीय कार्य अघि बढाइरहेको बताएका छन् ।

वडा अध्यक्षसहित स्थानीय जनप्रतिनिधि, प्राविधिक टोली तथा वडा वासीहरूको सहभागितामा ढलानको काम सम्पन्न गरिएको हो । वडा भवन निर्माण भए पछि सेवा प्रवाहलाई थप प्रभावकारी बनाउने , कार्यालयको आफ्नै संरचना भएपछि सेवा लिन आउने नागरिकहरूलाई सजिलो हुनुका साथै सरकारी कामकाज पनि व्यवस्थित ढंगले सञ्चालन गर्न सकिने अध्यक्ष केसी को भनाई छ।

भवन निर्माण सम्पन्न गर्नको लागि अब बाँकी रहेको दोस्रो तला, प्लास्टर, रंग रोगन तथा आवश्यक संरचनात्मक कामहरू आगामी महिनाहरूमा सम्पन्न गरिने लक्ष्य लिइएको छ।स्थानीयको आकांक्षा, जनप्रतिनिधिको प्रतिबद्धता र प्राविधिकको समन्वयमा निर्माण कार्यले पूर्णता पाउने विश्वास समेत लिइएको स्थानिय को भनाई छ।

बढिगङ्गा नगरपालिकाले ७ नम्बर वडा बाहेक अन्य सबै वडामा आफ्नै प्रशासकीय भवनबाट सेवा दिईरहेको छ ।