स्वामीकार्तिकको उपाअध्यक्ष पदको उपनिर्वाचमा कांग्रेसबाट शाही उम्मेदवार

कार्तिक २९,बाजुराः १६ मंसिरमा हुने स्वामिकार्तिकको उपाअध्यक्ष पदको उपनिर्वाचनमा नेपाली काँग्रेसबाट पुल्तीशरा शाहीलाई सिफारिस गरिएको छ । उपनिर्वाचनको लागी काँग्रेसका तर्फबाट शाहीलाई उम्मेदवार बनाउने निर्णय गरिएको नेपाली काँग्रेस बाजुराले जनाएको छ । कांग्रेसले उम्मेदवार बनाएकी शाही पार्टी संरचनामा प्रदेश सभा क मा सदस्य छन् ।नेपाली कांग्रेस बाजुराले स्वामीकार्तिक खापर गाउँपालिकाको उपाध्यक्षमा पुल्तीसरा शाहीलाई उम्मेदवार बनाउने भएको हो ।

०७९ मा कांग्रेसबाट उपाध्यक्षमा निर्वाचित मैना जोशीको २०८० माघ ४ मा निधन भएकाले उक्त पालिकामा उपनिर्वाचन हुन लागेको हो ।स्वामिकार्तिक खापर गाउँपालिकामा रिक्त रहेको उपाध्यक्ष पदका लागि मतदाता नामावली प्रकाशन भईसकेको छ । गाउँपालिकाको उपाध्यक्ष पदका लागि हुने उप निर्वाचनका लागि वडा नंम्बर १ मा १ हजार ७२४, वडा नम्बर २ मा १ हजार ३३८ र वडा नम्बर ३ मा २ हजार ७३ जना मतदाता रहेका छन्।

त्यस्तै वडा नम्बर ४ मा १ हजार ४१५ जना, र वडा नम्बर ५ मा ९०८ जना गरी सात हजार ४५८ जना मतदाता रहेका छन् । गाउँपालिकाको उपनिर्वाचनको लागी मुख्य निर्वाचन अधिकृत जिल्ला अदालत बाजुराका न्यायधिश संजीव पोखरेललाई तोकिएको छ । उपनिर्वाचनको लागी अहिले तयारी तिव्र पारिएको छ ।उपनिर्वाचनको लागी नेकपा एमालेबाट सुलोचना भण्डारी बुढालाई उम्मेदवार बनाइसकेको छ ।बुढा २०७९ को चुनावमा नेपाली काँग्रेसकी मैना जोशी संग पराजित भएकी थिईन् । बुढाले १ हजार ६३७ मत पाएकी थिइन भने जैशीले १ हजार ८१० मत पाएकी थिइन् ।  नेकपा माओवादी केन्द्रले पनि राजुकुमारी बिकलाई आधिकारीक उम्मेदवार बनाउने निर्णय गरेको छ । नेकपा एसले भने उम्मेदवार छनोट गर्न सकेको छैन् ।