बाजुरामा जाडाे: पानी जमेर बरफ (फाेटाेफिचर)

बाजुराः बाजुरामा अत्याधिक जाडोले पानी जमेर बरफ भएको छ।हिउँदको समय हिउँ नपर्दा अत्यधिक जाडोले पानी जमेर बरफमा परिणत भएको हो।

हरेक बर्ष झै यो बर्ष पनि बाजुरामा अत्याधिक जाडो महसुस गरिएको छ। यहाँका ९ वटै स्थानीय तहमा यतिवेला हरेक गाउँघरमा पानीका धारा,ताल तलाउ र खोलामा पानी जमेको हो।

रातिको समयमा अत्यधिक चिसो हुने भएकोले स-साना खोल्सा,तलाउ धाराको पानीमा बरफ जम्न थालेको हो । बाजुराका ९ वटै स्थानीय तहमा राति र बिहान तापक्रम माइनसमा झर्ने गरेको छ ।

पानीका मुहान,धारा,स-साना तालमा पानी जमेर बरफ हुन थालेको बाजुराको बडीमालिकाका स्थानीय कविराज पण्डितले बताए ।विहान र बेलुकीपख अत्याधिक जाडोले जताततै पानी जमेर बफरमा परिणत हुने गरेको पण्डितले जानकारी दिए।

त्यस्तै उत्तरी भेगमा पनि तापक्रम माइनसमा झरेकाले पानी बरफमा परिणत हुन थालेको बाजुराको पाण्डुसैनका स्थानीय अमर कठायले बताए ।दिउँसो घाम लागेको बेला पनि जमेको पानी बिलाउने नसक्ने अवस्था रहेको कठायतले जानकारी दिए ।

अत्याधिक जाडोले यहाँका बालबालिका लगायत बृद्धबृद्धालाई स्वास्थ्य समस्या हुनुका साथै दैनिक अस्पतालमा विरामीको चाप बढ्ने गरेको छ।जाडोले विहान बेलुकी कामकाज समेत प्रभावित बन्ने गरेको छ।

यो बर्ष हिउँदे बर्षा र हिमपात नहुँदा अत्याधिक जाडोको महशुस गरिएको छ।मंसिर पुस र माघ तीन महिना बाजुरामा अत्याधिक हिमपात हुनुका साथै तापक्रम माइनसमा हुने गर्दछ ।तापक्रम माइनसमा झरेसँगै चिसो बढेकाले बरफ जम्न थालेको हो।

पानी बरफमा परिणत भएका तस्वीर यहाँ प्रस्तुत गरिएका छन्ः