बुढीगंगामा फागुन १ गतेदेखि ६ गतेसम्म भेडाबाख्रामा पिपिआर रोग विरुद्धको खोप लगाईदै

बाजुराः जिल्लाको बुढीगंगा नगरपालिकामा फागुन १ गते अर्थात भोलीदेखि फागुन ६ गतेसम्म भेडाबाख्राका लागि राष्ट्रिय पिपिआर रोग विरुद्धको खोप अभियान सञ्चालन गरिने भएको छ ।नगरपालिकाको कृषि विकास शाखाले बुधबार एक सुचना जारी गर्दै नगरपालिकाको सेवा क्षेत्र भित्र रहेका भेडापालक कृषकहरुका भेडाबाख्रामा पिपिआर रोग विरुद्धको खोप लगाउने गरि अभियान संचालन गर्न लागीएको जनाएको छ ।

भेडाबाख्रामा महामारीका रुपमा फैलिन लागेको पिपिआर रोगलाई नियन्त्रण गर्नका लागि पिपिआर रोग विरुद्धको खोप अभियान संचालन गर्न लागेको बुढीगंगा नगरपालिका पशु सेवा शाखाले जनाएको छ । नगरपालिकाभित्र पिपिआर रोग विरुद्धको खोप अभियान संचालन गर्नका लागि भेटेरिनरी अस्पताल तथा पशु सेवा विज्ञ केन्द्रबाट आवश्यक खोपको डोजहरु प्राप्त भएकोले सेवा क्षेत्रका सवै वडाका गाउँबस्ती टोलहरुमा खोप अभियान संचालन गरिने बताइएको हो ।

अभियान अन्तरगत पहिलो चरणमा वडा नम्वर १० को डाव बजार देखि १ को बल्दे दवारी सम्मका भेडाबाख्रालाई पिपिआर रोग विरुद्धको खोप लगाईने भएको हो । खोप अभियान अन्तरगत संचालन हुने क्षेत्रमा आफुले पालेका भेडाबाख्राहरुलाई ल्याएर सो रोग विरुद्धको खोप लगाउन कृषकहरुलाई सार्वजनिक सूचना मार्फत आग्रह गरिएको छ । पिपिआर खोप अभियान अन्तरगत वडा नम्वर १० को डावबजार, मालिका बजार सिंगाडा क्षेत्रमा फागुन १ गते,त्यस्तै रिठाबजार, मोटाबाडा, बेतालमाण्डौं बजार २ गते, सायल, सिमकोट ३ गते, नुवाँकोट, तल्लो सायल बाम्का, बोहराबाडा, फालासैन, बेलकाटिया, ४ गते, बसाली, मुस्यालबाडा, ताँप्रीसेरा, बल्दे ५ गते र वडा नम्वर १ को अम्कोटमा फागुन ६ गतेका दिन अभियान संचालन गरिने भएको हो ।

पिपिआर रोग देखा परेका बाख्रामा ज्वरो आउने, खोक्ने, रगतमासी छेर्ने, रगत छेर्नेलगायतका लक्षण देखिन्छ । यो लक्षण देखिएको एक सातामै बाख्राको मृत्यु समेत हुने गरेको छ ।यस्ता रोगहरुबाट बचाउन भेडाबाख्रापालक कृषकहरुलाई नगरपालिकाले भेडाबाख्रामा खोप लगाउन सूचना मार्फत आग्रह गरेको छ ।