चाउचाउको खोलमा ल्याइएको चरेस सहित दुई जना पक्राउ

बाजुराः बाजुरामा चरेस सहित दुई जना पक्राउ परेका छन् । आईतबार कैदीबन्दीलाई भेट्न आएका दुईजनालाई चाउचाउको खोलमा राखिएको चरेश सहित पक्राउ गरीएको जिल्ला प्रहरी कार्यालय बाजुराका प्रहरी नायव उपरिक्षक दिलिप कुमार गिरीले बताएका छन् ।

डिएसपी गिरीले दिएको जानकारी अनुसार पक्राउ पर्नेमा बुढीगंगा नगरपालिका वडा.नम्बर.५ बस्ने बर्ष २५ का प्रेम थापा र सोही वडा बस्ने बर्ष २१ लक्ष्मण थापा रहेको गिरीले बताए । पक्राउ परेका प्रेम थापा जिल्ला हुलाक कार्यालय टाँटेका करार कर्मचारी समेत हुन् । दुबै जनालाई हिजो दिउँसो चाउचाउको खोलमा प्वाल पारेर राखेको अबस्थामा खानतलास गर्दा २.९८ ग्राम चरेस सहित पक्राउ गरीएको गिरीले बताएका छन् ।

चरेश फेला पारेपछि उनीहरुलाई नियन्त्रणमा लिई हिरासतमा राखिएको बताइएको छ । कैद भुक्तान गरिरहेका कैदीबन्दीलाई अवैध रुपमा कारागारमा चरेश ओसार पसार गर्न खोज्ने दुबै जनालाई आज बाजुरा जिल्ला अदालतमा मुद्धा दायर गरी म्याद थप गरिने प्रहरी नायव उपरिक्षक गिरीले बताएका छन् ।