महोत्सव संचालनमा प्रजिअ खड्का सुरु देखि नै बाधक बने- अध्यक्ष बोहरा

मिन बहादुर खड्का बाजुरा – खप्तड मालिका युवा संजाल बाजुराका अध्यक्ष शुक्रराज बोहराले प्रमुख जिल्ला अधिकारी पुष्कर खड्का  सुरुवाती देखि नै महोत्सवको बाधक बनेको आरोप लगाउनु भएको छ । आज समापन कार्यक्रममा बोल्दै अध्यक्ष बोहराले यस्तो बताउनुभएको हो ।

कृषि उद्योग, पर्यटन र व्यापार , जडिबुटी सस्कृती समृद्ध बाजुराको आधार भन्ने मुल नाराका साथ आयोजित प्रथम खप्तड मालिका उद्योग, कृषि, पर्यटन तथा व्यापार महोत्सव २०८९ यहीँ चैत्र ३ देखि संचालन भएको थियो । सो महोत्सव हुनुहुन्न भन्ने पक्षमा प्रजिअ खड्का सुरु देखि नै जिकिर गर्दै आएको उहाँले बताउनुभयो । विभिन्न चुनौतीका बिच पनि शान्तिपूर्ण ढङ्गले महोत्सव सम्पन्न गर्न सफल भएको दावी गर्नुभयो । सुरुवाती देखि नै महोत्सवको बाधक बन्ने प्रमुख जिल्ला अधिकारीलाई धन्यवाद समेत दिनुभयो । जिल्ला प्रशासन कार्यालय बाजुराको अनुमती बिना नै महोत्सव सम्पन्न गर्न सफल भएको उहाँले बताउनुभयो ।

आगामी दिनमा पनि यस्तै सामाजिक कार्य गर्दै जाने अध्यक्ष बोहराको भनाई छ । महोत्सवको अवधीभर सहयोग गर्ने सम्पुर्णलाई धन्यवाद दिनुभयो । महोत्सवको आयोजनाले जिल्लाको उद्योग, कृषि र व्यापारको प्रबर्द्धन स्थानीय उत्पादित बस्तुको प्रदशन, पर्यटकीय क्षेत्रको प्रचार प्रसार, स्थानीय कलाकारको पहिचान, जिल्ला स्थित अग्रज कलाकारको सम्मान हुनुका साथै समग्र जिल्लाको बिकासमा टेवा पुग्ने बिश्वास व्यक्त गर्नुभएको छ । प्रजिअ खड्काले महोत्सव गर्न अनुमती दिने, सुरक्षाकर्मी खटाउने र महोत्सवको अवधी थप गर्न अटेरी गरेको उहाँको आरोप छ । महोत्सवको अवधी थप गर्ने तयारी भएको भएपनि प्रशासनले अनुमती नदिएको उहाँको भनाई छ । आन्तरिक रुपमा राजनीतिकरण गरि महोत्सव रोक्ने षड्यन्त्र भएको पनि उहाँले बताउनुभयो । विभिन्न बाहाना बनाई महोत्सव रोक्न लगाएको अध्यक्ष बोहराको भनाई छ ।

जनताको अभिभावक प्रशासनले सहयोग गर्नुको सत्ता उल्टै खुलेर असहयोग गरेको उहाँको आरोप छ । प्रजिअ खड्काको यो मनोमानी प्रती हाम्रो घोर आपत्ति छ । कोही उहाँको समर्थक आउनुभएको छ भने सुनाईदिनुहोला । खुलेर असहयोग गर्नुभएकोमा धन्यवाद दिएको छ भनी दिनु अध्यक्ष बोहराले भन्नुभयो । अध्यक्ष बोहराले आगामी दिनमा पनि खप्तड मालिका युवा संजालले समग्रमा जिल्लाको बिकासमा टेवा पुग्ने खालका कामहरु गर्ने प्रतिबद्धता व्यक्त गर्नुहुँदै आगामी दिनहरूमा पनि यस्तै साथ सहयोग भने सवैको आवस्यक रहेको बताउनुभयो ।