बजारीकरणका लागि बाजुराका स्याउ जिल्ला बाहिर

राजेन्द्र विक बाजुरा-  यस वर्ष बाजुरामा अत्यधिक मात्रामा स्याउ उत्पादन भएको छ। स्याउ जिल्लामै खपत गर्न मुस्किल हुने अवस्था आएकाले बजारीकरणका लागि जिल्ला बाहिरका ठूला शहरहरुमा पठाउने गरी तयारी शुरु गरिएको छ। बाजुरामा उत्पादित स्याउ सुदूरपश्चिमको धनगढी, कर्णाली प्रदेशको सुर्खेत र लुम्बिनी प्रदेशको नेपालगञ्ज तथा राजधानी काठमाडौंसम्म भदौं दोस्रो साता सम्म पुर्याइने कृषि ज्ञान केन्द्र बाजुराका कृषि अधिकृत तथा सूचना अधिकारी मीन प्रसाद जैसीले बताए। कृषकहरुले स्याउ बिक्री गर्न हतार गरिरहेका छन।

तर बाजुराको स्याउ भदौं दोस्रो सातासम्म मात्र सबै हिसाबले खान उपयुक्त हुने हुँदा कृषि ज्ञान केन्द्र बाजुराले ढुवानी अनुदानमा किसानको बारीबाटै स्याउ उठाएर बजारीकरणका लागि देशका ठूला शहरहरुमा भदौको १५ गतेबाट पठाइदिने योजना ज्ञान केन्द्रको रहेको जैशिको भनाइ छ। वर्षात्ले जिल्लाका ग्रामीण सडकहरु अबरुद्ध भई स्याउ ढुवानी गर्न समस्या हुने चिन्तामा रहेका स्याउ कृषक भने ज्ञान केन्द्र बाजुराले ढुवानी अनुदान सहित बजारीकरण गरिदिने भएपछि निकै खुशी भएका छन्।यो वर्ष राम्रो स्याउ फल्यो तर सडक अबरुद्ध हुनाले ढुवानी गरेर बिक्री गर्न नपाइ बारीमै कुहिने पिरलो किसानमा थियो।

अब ढुक्क छौं स्याउले बजार पाउने भो स्वामिकार्तिक खापर गाउँपालिका वडा नम्बर(५जेराका स्याउ कृषक टेकेन्द्र सिंहले खुशी व्यक्त गरे। जिल्लाका स्वामिकार्तिक, हिमाली र जगन्नाथ गाउँपालिकामा उत्पादित स्याउहरु कोल्टी विमानस्थलबाट हवाइजहाजमार्फत् नेपालगन्ज र बुढिनन्दाको पाण्डुसैनमा उत्पादित स्याउहरु जिपमार्फत् धनगढी र सुर्खेत पठाइने कृषि ज्ञान केन्द्र बाजुराका प्रमुख हरि पनेरुले बताए। निकै मिठो र अर्गानिक मानिएको बाजुराको स्याउ उपभोक्ताको पहिलो रोजाइमा पर्दै आएको छ। बाजुरा जिल्लाभर १ सय ७० हेक्टर क्षेत्रफलमा १ हजार २० मेक्ट्रिक्टन स्याउ उत्पादन हुने गरेको छ।