धनगढी विमानस्थल स्तरोन्नति : सर्भे सकियो, मन्त्रिपरिषद्ले तोक्यो प्रारम्भिक अधिकारी

धनगढीः धनगढी विमानस्थल स्तरोन्नतिका लागि आवश्यक पर्ने जग्गाको सर्भे गर्न आएको टोली काठमाडौं फर्किएको छ। नेपाल नागरिक उड्डयन प्राधिकरणले सर्भेका लागि धनगढी खटाएको टोली काम सकेर काठमाडौं फर्किएको हो।

धनगढी विमानस्थलका प्रमुख रामकृष्ण भट्टले २ सय ५८ विघा जग्गा अधिग्रहण गर्न प्राविधिक टोलीले सर्भे गरेको बताए। उनका अनुसार सर्भे रिपोर्ट प्राधिकरणमा समेत पेश गरिएको छ। तर सर्भेले निकालेको तथ्यांक र नापीसँग भएको डिजिटल नक्सालाई मिलाउनु पर्ने हुँदा उक्त रिपोर्ट सार्वजनिक गर्न केही समय लाग्ने धनगढी विमानस्थलका प्रमुख भट्टले बताए।

‘सर्भे गर्ने टोली काम सकेर फर्किएको छ,झ उनले भने, ञमन्त्रिपरिषद् बैठकले प्रारम्भिक अधिग्रहण अधिकारीसमेत तोकिसकेको छ। अब छिट्टै अन्य कामसमेत अगाडि बढ्छ।’

धनगढी विमानस्थलका लागि जग्गा अधिग्रहण गर्न विमानस्थलकै कार्यालय प्रमुख रामकृष्ण भट्टलाई नै प्रारम्भिक अधिग्रहण अधिकारी तोकिएको हो। मुआब्जा निर्धारण समितिको जिम्मा भने प्रमुख जिल्ला अधिकारीलाई दिनुपर्ने प्रावधान छ। योसँगै धनगढी विमानस्थल विस्तारको कामले गति लिने अपेक्षा गरिएको छ।

नागरिक उड्यन प्राधिकरण क्यानको ३९२औं बैठकले धनगढी विमानस्थललाई क्षेत्रीय विमानस्थलका रुपमा विस्तार गर्नका लागि नक्सा पारित गर्ने निर्णय गरेको थियो। साथै २५८ बिगा जग्गा अधिग्रहण गर्ने प्रस्ताव समेत पारित गरेको थियो। अहिले विमानस्थलमा १८ सय मिटरको धावनमार्ग छ भने स्तरोन्नतिका लागि २५५० मिटरको छुट्टै धावनमार्ग बनाइने छ।

‘अहिलेको धावनमार्गलाई ट्याक्सी मार्गका रुपमा प्रयोजन गर्ने योजना छ,’ नागरिक उड्यन प्राधिकरणका इन्जिनियर मुरारी भण्डारीले भने, ‘नयाँ धावनमार्ग अहिलेको भन्दा केही उत्तरमा बन्छ।’ सर्भे प्रतिवेदन सार्वजनिक भएपछि मात्रै कुन क्षेत्रको कति जग्गा अधिग्रहण हुनेबारे टुंगो लाग्ने छ।

रोशन भट्ट
यो समाचार आजको दिनेश खबरमा छ ।