हेलिकप्टरमार्फत एक सुत्केरी महिलाकाे उद्धार

बाजुरा: बाजुराको बुढीनन्दा नगरपालिकाकी एक सुत्केरी महिलाको हेलिकप्टरबाट उद्धार गरिएको छ।बुढीनन्दा नगरपालिका–१० की २८ वर्षीया सनिता ल्वारलाई हेलिकप्टरमार्फत उद्दार गरिएको हाे।

ल्वारलाई सुत्केरी व्यथा लागेपछि सुत्केरी गराई सके पनि अत्याधिक रक्तस्राव हुनुका साथै बच्चाको शाल सम्बन्धी समस्या देखिएपछि अवस्था जटिल बन्दै जाँदा हेलिकप्टर मार्फत उद्धार गरी सुर्खेत प्रादेशिक अस्पताल पठाइएको हाे।

राष्ट्रपति महिला उथ्थान कार्यक्रम अन्तर्गत नेपाली सेनाको हेलिकप्टरबाट उनलाई उद्धार गरि सुर्खेत पठाईएकाे प्रमुख जिल्ला अधिकारी डाेरेन्द्र निराैलाले जानकारी दिए।जटिल प्रसुती समस्या देखिए पछि उनलाई तत्काल हेलिकप्टर मार्फत उद्दार गरिएको प्रजिअ निराैलाले बताउनुभयाे।

गर्भावस्थामा एक पटक पनि चेकजाँच नगरेकोले अहिले उनमा जटील समस्या उत्पन्न भएको हाे।बाजुरामा उपचार सम्भव नभएकोले जिल्ला प्रशासन कार्यालयमा जानकारी गराएर प्रशासनको पत्रचारपछि उनलाई रिफर गरीएको अस्पताल बाजुराले जनाएको छ ।

गर्भवती र सुत्केरी महिलाहरूको ज्यान जोगाउने उद्देश्यले सञ्चालनमा ल्याइएको यस कार्यक्रमले ग्रामीण तथा दुर्गम क्षेत्रका आमाहरुकाे जीवनरक्षा गर्दै आएको छ।तर दुर्गम क्षेत्रमा सुविधा सम्पन्न स्वास्थ्य संस्था र सहज उपचार नहुँदा बर्षेनी यहाँका आमाहरुले समस्या भाेग्नुका साथै मृत्युवरण गर्नुपर्ने बाध्यता रहेकाे छ।