बुढीगंगा नगरपालिकाले टाेल-टाेलमै थाल्याे अल्ट्रासाउन्ड र ल्याब सेवा

बाजुरा: बाजुराकाे बुढिगंगा नगरपालिकाले टाेल-टाेलमै गएर अल्ट्रासाउन्ड र ल्याब सेवा सञ्चालन गर्न थालेकाे छ ।गर्भवती महिलाको स्वास्थ्य सुरक्षालाई ध्यानमा राख्दै पालिकाले यस्ताे सेवा सञ्चालन गरेकाे हाे।

पालिकाले टाेल-टाेलमै पुगेर निःशुल्क अल्ट्रासाउन्ड र ल्याब सेवा सञ्चालन गर्न थालेपछि यहाँका स्थानीय महिलाहरू लाभान्वित भएका छन् ।पहिले सामान्य चेकजाँच गर्न समेत नपाउने यहाँका महिलालाई पछिल्लो समय घरमै सेवा-सुविधा पाउन थालेका छन्।

नगरपालिकाका १ देखि १० नम्बर वडासम्म मासिक रूपमा स्वास्थ्यकर्मीको टोली पुगेर चेकजाँच गर्ने गरिएको नगर प्रमुख रामबहादुर बाँनियाले बताएका छन् ।पालिकाका महिलाहरुकाे स्वास्थ्य अवस्था सुधारका निमित्त याे प्रक्रिया अपनाईएकाे नगर प्रमुख बाँनियाले जानकारी दिए।

गैरसरकारी संस्थाको सहकार्यमा सञ्चालित यस कार्यक्रम अन्तर्गत गर्भवती महिलाका लागि अल्ट्रासाउन्ड, रक्तअल्पता, सुगर, पिसाब जाँच लगायत आवश्यक परीक्षण निःशुल्क उपलब्ध गराईने व्यवस्था छ।

सेवा गाउँमै उपलब्ध भएपछि गर्भवती महिलाहरूको समय, खर्च र शारीरिक मेहनतकाे बचत समेत भएको छ। सदरमुकाम मार्तडी पुगेर उपाचार गराउ दिनभर लाग्थ्यो,अहिले गाउँमै सेवा पाउँदा समय र खर्चकाे बचत भएको बुढीगंगा-८ की निर्मला कुमालले बताईन्।

आफूले पनि तीन पटक आफ्नै गाउँमा बसेर अल्ट्रासाउन्ड तथा ल्याब सेवा पाएको बताउदै अन्य महिलाहरुले पनि सहज रुपमा सेवा पाईरहेकाे उनले बताएकी हुन्।नगरपालिकाले गाउँमै पुगेर निःशुल्क सेवा उपलब्ध गराएपछि स्थानीय महिलाहरू राहत पाएका मिलेकाे हाे।