रेविज विरुद्धको खोप अभाव

बाजुराः जिल्ला अस्पताल र स्वास्थ्य संस्थाहरुमा रेविज विरुद्धको खोप अभाव भएको छ । सरकारले स्वास्थ्य संस्थाहरुमा निःशुल्क रुपमा उपलव्ध गराउँदै आएको रेविज विरुद्धको खोप नहुँदा सेवाग्राहीहरु मर्कामा परेका छन् । सरकारले निःशुल्क रूपमा उपलब्ध गराउँदै आएको रेविज विरुद्धको खोप एक हप्तादेखि अभाव भएको जिल्ला अस्पताल बाजुराले जनाएको छ । जिल्ला अस्पताल बाजुराले सार्वजनिक सूचना जारी गर्दै रेविज विरुद्धको खोप अभाव भएको जनाएको हो ।

अस्पतालमा रेविज विरुद्धको खोप प्रदेश आपूर्ति केन्द्र धनगढीमा इपिडिमियोलोजी तथा रोग नियन्त्रण महाशाखाबाट आउने गरेको र हाल सो स्थानमा खोप प्राप्त नभएकोले सेवा बन्द गरिएको जिल्ला अस्पताल बाजुराले जनाएको छ । जिल्लामा रेविज विरुद्धको ओप नहुँदा कुकुर तथा स्यालको टोकाईबाट घाइते भएका विरामीहरुलाई सास्ती हुने भएको छ ।

कुकुर र स्याल लगायतका जनावरले टोकेमा रेविजको खोप एक हप्तासम्म लगाउनुपर्ने भएपनि खोप नहुँदा उनीहरु समस्यामा पर्ने भएका हुन् ।खोप प्रदेश सरकारले नपठाउँदा जिल्लामा रेविज विरुद्धको खोप अभाव भएको हो ।