स्वामीकार्तिकको उपाअध्यक्षमा एमालेकी सुलोचना निर्वाचित, पार्टीको विरासत फर्काउन सफल

मंसिर १७,बाजुराःजिल्लाको स्वार्मिकार्तिक गाउँपालिकामा उपाअध्यक्ष पदको लागी भएको उप निर्वाचनमा एमालेकी सुलोचना भण्डारी बुढा निर्वाचित भएकी छन् । २०७९ को स्थानीय तहको निर्वाचनमा १७३ मतले पराजित भएकी एमाले उम्मेदवार सुलोचना कुमारी भण्डारी बुढाले उप-निर्वाचनमा बढी मत पाउँदै उपाअध्यक्षमा निर्वाचित भएकी छन। २०७९ को निर्वाचनमा एमाले काँग्रेसकै प्रतिस्पर्धामा काँग्रेस उम्मेदवार मैनादेवी जोशी विजयी भएकी थिइन् ।

जोशीले एक हजार ८१० ल्याएर विजयी हुँदा बुढाले एक हजार ६३७ पाएकी थिइन् । जोशीको निधन भएपछि भएको उपनिर्वाचनमा नेपाली काँग्रेसका उम्मेदवार पुल्तीसरा शाहीलाई २६६ मतले पछि पार्दै सुलोचना निर्वाचित भएकी हुन् ।

सुलोचना १ हजार ७४० मत सहित विजयी हुँदा काँग्रेस उम्मेदवार पुल्तीसराले १ हजार ४७४ मत पाइन् । नेकपा एकीकृत समाजवादीकी जवा शाहीले ५५३ पाएकी छन् । ७ हजार ४६० मध्ये ३ हजार ९०३ जनाले मतदान गरेका थिए ।जम्मा खसेको मत मध्ये ३ हजार ७ सय ६७ मत सदर भएका थिए भने १ सय ३६ मत बदर भएका थिए ।