बाजुरामा १७ हजार ५ सय मेट्रिक टन धान उत्पादन

गोबिन्द्र राज तिमिल्सेना,कार्तिक २९,बाजुराः बाजुरामा यस बर्ष १७ हजार ५ सय मेट्रिक टन धान उत्पादन भएको छ । जिल्ला कृषि ज्ञान केन्द्र बाजुराका अनुसार यस आर्थिक बर्ष २०८१ /०८२ मा कुल ७ हजार ३ सय ३ हेक्टर क्षेत्रफलमा १७ हजार ५ सय मेट्रिक टन धान उत्पादन भएको जनाएको छ । गत बर्षको तुलनामा यस बर्ष धान उत्पादनमा बृद्धि भएको जिल्ला कृषि ज्ञान केन्द्र बाजुराका निमित्त कार्यालय प्रमुख भुमिराज उपाध्यायले बताएका छन् ।

निमित्त कार्यालय प्रमुख उपाध्यायका अनुसार गत आर्थिक बर्ष २०८०/०८१ मा १६ हजार ५ सय ६५ मेट्रिक टन धान उत्पादन भएकोमा यस आर्थिक बर्षमा अघिल्लो आर्थिक बर्षको भन्दा बढी अर्थात १७ हजार ५ सय मेट्रिक टन धान उत्पादन भएको बताए । अघिल्लो आर्थिक बर्ष भन्दा यो आर्थिक बर्षमा ९ सय ३५ मेट्रिक टन धान बढी उत्पादन भएको हो । यो आर्थिक बर्षमा धान उपज २.४० रहेको छ भने अघिल्लो आर्थिक बर्षमा २.२७ रहेको ज्ञान केन्द्र बाजुराको तथ्यांकमा रहेको छ ।

जिल्लामा अघिल्लो वर्ष ७ हजार ३ सय ३ हेक्टरमा र यस बर्ष पनि ७ हजार ३ सय ३ हेक्टरमा धानखेती गरिएको बताइएको छ । बाजुरामा पछिल्लो समय अघिल्लो बर्षको तुलनामा पछिल्ला बर्षहरुमा केही मात्रामा धान उत्पादनमा बृद्धि हुदै गईरहेको कृषि ज्ञान केन्द्र बाजुराको भनाई रहेको छ । पछिल्लो समय बाजुरामा पनि उन्नत जातका धान लगाउने प्रचलन बढेको छ । विशेषगरी रामधान,जुम्ली, सावित्री, हिमाली धान,खुमल जस्ता उन्नत धान लगाउने गरिन्छ । कृषि ज्ञान केन्द्रले उन्नत जातप्रति किसानको आकर्षण बढ्दै जाँदा स्थानीय जातका धान लोप हुनसक्ने भएकाले त्यसलाई मध्यनजर गर्दै रैथाने बाली तथा बीउ संरक्षणका कार्यक्रम पनि सञ्चालन गर्दै आएको छ । पछिल्लो समय किशानहरुले उन्नत जातका धानखेती गर्ने गरेको हुँदा ज्ञान केन्द्रले पनि कतिपय उन्नत खाले धानको बिउ बितरण गर्ने गरेको छ ।

जिल्लामा धान खेतिका लागि कुल क्षेत्रफल ७२३० हेक्टर सिंचित र रोपाइँ हुने खेत ५२०० हेक्टर, असिंचित र पाखो धान खेती २०३० हेक्टर रहेको कृषि ज्ञान केन्द्रको तथ्याकं रहेको छ । त्यस्तै कुल खेति गरिएको जमिन २६१६ हेक्टर छ । कुल खेती गरिएको क्षेत्रफलको २७.३५ मा धान खेती गर्ने गरिन्छ ।बाजुरामा पाँच हजार २३५ हेक्टर जमिन मात्र वर्षभरिमा सिँचाइ हुने गरेको कृषि ज्ञान केन्द्र बाजुराले जनाएको छ ।

ज्ञान केन्द्र बाजुराका निमित्त कार्यालय प्रमुख भुमिराज उपाध्यायले उहाँले भन्नुभयो, “बाजुरामा २ लाख ३० हजार ३७ हेक्टर जमिन छ । यो मध्ये २८ हजार १३५ हेक्टर मात्र खेतीयोग्य जमिन छ ।” बाजुरामा २७ हजार १६० हेक्टर जमिन छ । यसमध्ये बाजुरामा ७ हजार ३०३ हेक्टर जमिनमा मात्र धान रोपाइँ हुने गरेको प्रमुख उपाध्यायले बताउनुभयो ।बाजुरामा प्रयाप्त मात्रामा सिचाईको सुबिधा नुहुनु,आकाशे पानी भरमा बढीजसो धान खेती गर्नुपर्ने हुँदा समयमै रोपाई नभएर सधैजसो धान उत्पादनमा गिरावट आउने गरेको छ ।

दुई आर्थिक बर्षको धान उत्पादनको तथ्याकं