नेपाल आइडल सिजन- ५ को उपाधि करण परियारलाई

खप्तड मालिका न्युज,असार ९,बाजुराः  सांगितिक गायन रियालिटी शो नेपाल आइडल सिजन ५ को उपाधि करण परियारले जितेका छन् । बर्दियामा जन्मेका करणले नेपाल आइडल सिजन ५ को उपाधि जित्न सफल भएका हुन। शनिबार राति नेपाल आइडलको स्टुडियोमा भएको ग्रान्ड फिनालेमा अन्य फाइनलिस्टहरु मोहित भुजेल, सलोमी गुरुङ र सचिन विश्वकर्मालाई पछि पार्दै उनी विजेता बनेका हुन् । आम दर्शकहरुको मन मुटुमा बस्न सफल परियारले दर्शककै माया र दर्शकको भोटको आधारमा उपाधि जित्न सफल भएका हुन्।

आइडलको उपाधि जितेसँगै करनले ट्रफीसहित २५ लाख रुपैयाँ नगद र अन्य पुरस्कार प्राप्त गरेका छन् । प्रतियोगितामा पोखराकी सलोमी गुरुङ फस्ट रनरअप बनिन् । उनले ट्रफीसहित नगद १० लाख पुरस्कार प्राप्त गरिन् । यस्तै दार्जिलिङका सचिन विश्वकर्मा सेकेन्ड रनरअप बने । उनले नगद ५ लाख रुपैयाँ प्राप्त गरे ।भने दार्जिलिङकै मोहित भुजेल थर्ड रनरअप भए । उनले स्कुटर पुरस्कार प्राप्त गरेका छन् ।
यो भन्दा अगाडी चार वटा सिजन पुरा भएकोमा यो संगै आइडलको पाँच सिजन पुरा भएका छन् । यसअघि पहिलो सिजनमा बुद्ध लामा, दोस्रोमा रवि ओड, तेस्रोमा सज्जा चौलागाईं र चौथोमा भूपेन्द्र थापा मगरले नेपाल आइडलको उपाधि चुमेका थिए। सिजन ५ को उपाधि भने करण परियारले हात पारेका छन् ।

चार महिनादेखि जारी नेपाल आइडल सिजन ५ समापन भएको हो । नेपाल आइडलका निर्णायकहरु न्ह्यू बज्राचार्य, इन्दिरा जोशी र कालीप्रसाद बाँस्कोटा छन् ।ग्रान्ड फिनालेमा नेपाल आइडल सिजन ३ की विजेता सज्जा चौलागाईं, पूर्वप्रतिस्पर्धी समेत रहेका गायक गायिकाहरु प्रताप दास, प्रवीण बेडवाल, मेनुका पौडेल, अफ्सर अली, यो सिजनका टप १० प्रतिस्पर्धी लगायतले प्रस्तुति दिएका थिए ।उक्त शोलाई रीमा विश्वकर्मा र आसिफ शाहले होस्ट गरेका थिए ।