अँगाउपानी (काँध) मा एकै पटक रोपियो सात हजार बढी स्याउका बोटहरु

संगिता तिमिल्सेना,बाजुराः  बाजुरामा एकैपटक सात हजार बढी स्याउ रोपिएको छ । जिल्लाको बुढीनन्दा नगरपालिका वडा नं ९ अँगाउपानी (काँध) मा १ सय १५ जना परिवारको सहभागितामा एकै पटक सात हजार तीन सय बोट स्याउ रोपेर सामुदायिक बृहत स्याउ बगैँचा स्थापना गरिएको हो ।

कृषि ज्ञान केन्द्र बाजुरा को बृहत विशेष उत्पादन कार्यक्रम अन्तरगत बुढीनन्दा नगरपालिका ९ अँगाउपानी (काँध) मा १ सय १५ जना परिवारको सहभागितामा ७ हजार ३ सय बोटको करिव २५ हेक्टरमा एउटै क्लष्टरमा स्याउ रोपेर सामुदायिक स्याउ बगैँचा स्थापना गरिएकोे कृषि ज्ञान केन्द्र बाजुराका निमित्त कार्यालय प्रमुख मिन प्रसाद जैशीले बताउनुभयो ।
सोही स्थानमा आगामी बर्ष थप ७ हजार सात सय बोट थप गरि पन्ध्र हजार बोटको स्याउ बगैँचा स्थापना गर्ने लक्ष्य रहेको निमित्त कार्यालय प्रमुखले जैशीले बताउनुभयो । सोही बृहत स्याउ बगैचाबाट अबको ५÷६ बर्षपछि एक बोटबाट ३० किलोग्राम मात्रै स्याउ फलेमा पनि चार हजार पाँच सय क्वीन्टल स्याउ उत्पादन भई किलोको रू एक सय का दरले बिक्रि गर्न सकेमा करिब ४ करोड ५० लाख रकम ती १ सय १५ कृषक परिवारको हातमा पर्ने कृषि ज्ञान केन्द्र बाजुराको अनुमान छ ।

अँगाउपानी (काँध) मार्तडी – कोल्टी सडकाको आसपासको क्षेत्र भएकोले कृषि पर्यटन मार्फत निकै नै लाभ लिन सकिने र या क्षेत्र स्याउ उत्पादनका लागि उपयुक्त भएकाले कृषि ज्ञान केन्द्र बाजुरा को बृहत विशेष उत्पादन कार्यक्रम कार्यान्वयन गरी कृषकलाई आत्मनिर्भर बनाउन लागिएको बुढीनन्दा नगरपालिका वडा नं ९ का वडाध्यक्ष मानबहादुर रावतले बताउनुभयो । उहाँले भन्नुुभयो ‘यहाँका अधिकांश कृषकले स्याउ खेती गर्ने गरेको भएपनि व्यावसायिक रुपमा थोरैले मात्रै सो खेती गर्ने गरेको र सो क्षेत्र कृषि प्राविधिकको जाँचबुझ र आवश्यक परामर्शबाट खेती गरे कृषकले मनग्गे आम्दानी लिन सक्ने भएकाले कार्यक्रम कार्यान्वयन गर्न लागिएको हो ।

‘फलफूल रोपौं, कृषक पेन्सन कार्यक्रममा सहभागी बनौं’ भन्ने अभियानका साथ आफुहरु अगाडी बढेको बुढीनन्दा नगरपालिकाका नगरप्रमुख जनक बोहराले बताउनुभयो । अहिले फलफुल रोपे ५÷६ बर्षपछि निरन्तर बिना मेहनत बोट फल्ने भएकाले कृषकहरुका लागि फलफुल खेती पेन्सन सोसरह भएकाले प्रोत्साहनका लागि यस्ता कार्यक्रम संचालन गरिएको नगरप्रमुख बोहराको भनाई छ ।बृहत स्याउ बगैँचा स्थापनाका लागि बृहत विशेष उत्पादन क्षेत्र संचालक समिति, हरित स्वंयमसेवक, वडा अध्यक्ष लगायत जनप्रतिनिधि, कृषि विकास शाखा बुढीनन्दा लगायत स्थानिय कृषकलाई सक्रिय रुपमा परिचालन गरिएको छ ।

स्याउ बाजुराको बुढीनन्दा नगरपालिकाको वडा नं ९ अँगाउपानी, वडा नं ३ को ताडी, घोडाकोट, हिमाली गाँउपालिका–१ को बाम,नेटा,चिन वडा नं २ को कोटीगाँउ, रुम्दी, वडा नं ३ को गुम्बा, वडा नं ४ को बोर्ता, वडा नं ५ को बछ्या,ग्याम्चु, खामलेक र ६ को झिनी स्वामिकार्तिक खापर गाउँपालिकाको वडा नं ३ मा रहेको संकल्पे, संैदेओ, जेवाले, खुन्का, लोथी र वडा नं १ को जोरु र गौेमुल गाउँपालिका वडा नं १ को अम्लिश, अन्द्राडी, वडा नं ४ को निलासैन लगायत विभिन्न स्थानमा स्याउ उत्पादन हुने गर्दछ ।बाजुरामा गत वर्ष उत्पादन भएको मध्ये २० लाख बराबरको स्याउ धनगढी, नेपालगञ्ज लगायतका विभिन्न शहरमा निर्यात भएको थियो ।