सागर र विवेकको नेपाली क्रिकेट टोलीमा डेब्यू

 (हाम्रो खेलकुद) – युवा स्पिनर सागर ढकाल र अलराउन्डर विवेक यादवले चार देश सम्मिलित टि२० आई सिरिज अन्तर्गत ओमानविरुद्ध नेपाली क्रिकेटका लागि डेब्यू गरेका छन् ।
खेलको लागि टस ओमानको मस्कटमा रहेको अलअमरेत क्रिकेट ग्राउन्डमा केहि समयमा हुँदै छ । टस अघि नेपालले विवेक यादव र सागरलाई डेब्यू दिएको हो । बायाँ हाते युवा स्पिनर सागर ढकालले घरेलु क्रिकेटमा लगातार राम्रो प्रदर्शन गर्दै आएका छन् । असोजमा सम्पन्न इपिएलमा कमजोर मानिएको चितवन टाइगर्सलाई च्याम्पियन बनाउन सागर ७ खेलमा १४ विकेटका साथ शीर्षस्थानमा रहँदै प्रतियोगिता उत्कृष्ट खेलाडी चुनिएका थिए । २०१८ सेप्टेम्बरमा यू–१९ एसिया कप तयारीको लागि भारतको लखनउमा चार देश सम्मिलित एक दिवसिय खेलमा अफगानिस्तानलाई २५ रनले हराउँदा सागरले १० ओभरमा ३ मेडनसहित २९ रन खर्चेर ४ विकेट लिएका थिए ।मलेसियामा २०१९ मा जुलाई सम्पन्न एसिसी इस्टर्न रिजनमा नेपाललाई उपाधि जिताउन सागर प्रतियोगिताकै सर्वोत्कृष्ट खेलाडी चुनिएका थिए । उनले ४ खेलमा १५ विकेट लिएका थिए । फाइनलमा हङकङविरुद्ध ५ र समूह चरणमा चीनविरुद्ध ६ विकेट लिएका थिए । २०१९ को डिपिएलमा महेन्द्रनगर युनाइटेडलाई फाइनल सम्म पुर्याउन ६ खेलमा ११ विकेट लिएका थिए ।
युवा अलराउन्डर विवेक यादव आक्रामक ब्याटिङका लागि चिनिन्छन् । पछिल्लो एक वर्षयता विवेकले घरेलु क्रिकेटमा लगातार उत्कृष्ट प्रदर्शन गर्दै आएका छन् । विवेक आक्रामक ब्याटिङसँगै पार्टटाइममा तीव्र गतिको बलिङ पनि गर्ने गर्दछन् ।
इपिएलमा पोखरा राइनोजलाई फाइनल सम्म पुर्याउन विवेकको योगदान महत्वपूर्ण थियो । चितवसँग विवेकले जिम्मेवारी इनिङ खेल्दै ४५ बलमा ३ चौका र ३ छक्का सहित ५३ रनको अविजित थिए । काठमाडौं सँगको निर्णायक खेलमा उनले तीन विकेट र ४१ रनको अविजित इनिङ खेल्दै प्लेयर अफ द म्याच चुनिएका थिए ।यू–१९ राष्ट्रिय प्रतियोगितामा मधेश प्रदेशको कप्तानी गर्दै प्रदेश १ विरुद्ध विवेकले ७१ बलमा ४ चौका र ६ छक्कासहित ७० रनको इनिङ खेलेका थिए । बागमती प्रदेशविरुद्ध ७३ बलमा ६ चौका र ७ छक्कासहित ८६ रनको अविजित इनिङ खेलेका थिए । डिसेम्बरमा युएईमा भएको यू–१९ एसिया कपमा विवेकले श्रीलंकाविरुद्ध २९ बलमा ३ चौका र ३ छक्कासहित ४६ रनको इनिङ खेलेका थिए । मधेश प्रदेशबाटनै लुम्बिनी प्रदेशविरुद्ध विवेकले १० औं नम्बरमा ब्याटिङ गर्दै २४ बलमा २ चौका र ३ छक्कासहित ३६ रनमा अविजित रहे ।
एक वर्षअघि विवेकले काठमाडौंमा सम्पन्न प्रधानमन्त्री कप एकदिवसिय क्रिकेट प्रतियोगितामा दुई लगातार उत्कृष्ट अर्धशतक प्रहार गरेका थिए । पहिलो खेलमा लुम्बिनीसँग आठौं नम्बरमा ब्याटिङ गर्दै ४९ बलमा ३ चौका र ३ छक्का सहित ५१ रन जोड्दै आउट भए। बागमतीविरुद्ध नवौं नम्बरमा ब्याटिङ गर्दै विवेकले ७४ बलमा ३ चौका र ३ छक्का प्रहार गर्दै ६६ रन बनाएका थिए ।
आइसिसी टि२० विश्वकप ग्लोबल छनोट अघि तयारी स्वरुप हुन लागेको यस सिरिज दुवै टोलीको लागि महत्त्वपूर्ण छ । ओमान र नेपाल विश्वकप छनोटमा एकै समूहमा हुँदा यस नतिजाले मनोबलमा ठूलो प्रभाव पार्ने देखिन्छ । नेपालको कप्तान सन्दीप लामिछाने र ओमानको जिशान मकसुदले कप्तानी गर्ने छन् । युवा जोश र जागँरले भोरिएको नेपाल ओमानलाई हराउँदै उत्कृष्ट सुरुवात गर्न चाहन्छ । ओमान घरेलु मैदान र वातावरणको फाइदा उठाउँदै नेपालमाथि सहज जित हात पार्न खोज्नेछ ।सन्दीपले कप्तानीमा डेब्यू गर्दैछन् । सन्दीप नेपालका लागि कप्तानी गर्ने १० औं कप्तान हुन् । टि२० आईमा पारस खड्का, ज्ञानेन्द्र मल्लपछि तेस्रो खेलाडी बन्नेछन् । सन्दीप, कुशल भुर्तेल, आसिफ शेख र दीपेन्द्रसिंह ऐरी नेपालका प्रमुख हतियार हुन् । जतिन्दर, मकसुद र बिलाल ओमानका प्रमुख हतियार हुन् ।
नेपालमा खेलको प्रदर्शन हिमायल टिभी, युटुबमा ओएसआर स्पोर्ट्स र दराज एप्सबाट हेर्न सकिने छ । आइसिसी लाइभ र फ्यान कोर्डबाट विदेशमा हेर्न सकिनेछ ।
नेपालको टोली :
सन्दीप लामिछाने (कप्तान), कुशल भुर्तेल, आसिफ शेख(विकेटकिपर) , दीपेन्द्रसिंह ऐरी, ज्ञानेन्द्र मल्ल, शरद भेषावकर, आरिफ शेख, करण केसी, जितेन्द्र मुखिया, अभिनाश बोहरा, शाहब आलम, कमलसिंह ऐरी, कुशल मल्ल, विवेक यादव, सागर ढकाल, लोकेश बम र प्रदीप ऐरी ।
ओमानको टोली :
जिशान मकसुद (कप्तान), जतिन्दर सिंह, कश्याप प्रजापति, शोहिब खान, मोहम्मद नदिम, अयान खान, नेस्टर धम्बा, सन्दीप गौड, नसिम खुशी (विकेटकिपर), खवर अली, अमिर कलिम, फयाज बट, कलिमुल्लाह, विलाल खान र खुर्मान नवाज ।