‘सुदूर तराइको मौसम दिउँसोदेखि सुधार हुन्छ’

धनगढी– सुदूरपश्चिमसहित देशभरको मौसममा आइतबारदेखि सुधार आउने देखिएको छ। जल तथा मौसम पूर्वानुमान महाशाखाले पश्चिमी न्यून चापीय प्रणालीको प्रभाव भने रहेको जनाएको छ।

मौसमविद् निराजन सापकोटाका अनुसार अहिले कैलाली र कञ्चनपुरमा हुस्सु् लागेको छ। ‘सुदूरपश्चिमका तराइका जिल्लामा विहानदेखि हुस्सुले चिसो बढेको छ,’ उनले दिनेशखबरलाई भने, ‘दिउसोदेखि मौसममा सुधार आउने पूर्वानुमान छ। घाम पनि लाग्छ।’

सुदूरपश्चिमका अधिकांश पहाडी क्षेत्रमा भने मौसम सफा रहेको सापकोटाले बताए। अहिले पहाडी भू–भागमा आंशिकदेखि सामान्य बदली रहेको छ। मौसम सुधार हुने क्रम जारी रहे पनि देशभर चिसो भने कायमै रहेकाले स्वास्थ्य सतर्कता अपनाउन मौसमविद्ले आग्रह गरेका छन्।

गएको बिहीबारदेखि नै देशभर बदली तथा वर्षा एवम् उच्च पहाडी क्षेत्रमा हिमपात भएको थियो। यो हिउँदमा परेको पानी तथा हिमपातले जाडो तथा तत्काल जनजीविका प्रभावित भए पनि कृषिका लागि भने फाइदा हुने बताइएको छ।